Health Minister Pu Lal Thanzara chuan vawiin khan Kawnpui Awithangpa Hall ah Kawnpui Consumer CoOperative Society Golden Jubilee a hmanpui.

Khuallian chuan Cooperative Society din chhan sawiin Cooperative Society chu mi harsa zawk leh khawtlang mipui te'n an nitin eichawp thil te man tlawm zawka an lei theih na tura din a nih thu a tarlang a, mimal sumdawng ten thil man an duh tawka an chhiar san theih loh nana nghet taka ding a nih thu a sawi bawk.Kawnpui Consumer Cooperative Society chu mipui vantlang tana malsawmna a nih thu sawiin neitu bik awmlo mi thahnemngai te ina mahni mimal hlawkna a tan niloa khawtlang mipui tana an din thu a sawi a . Cooperative Society chu a hohova enkawl a nih angin Dikna, Rinawmna leh Taimakna a pawimawh thu sawiin, hmun tam takah chuan Society hruaitute rinawm tawk loh avangin an tlak chhiat phah thu a tarlang a, hemi avang hian felfai tak leh dik taka sum vawn a pawimawh thu a sawi a ni.

Khawvel hmasawn zelah Privatization leh Globalization ten min chiah mek a,heng a tan hian mipuite chu kan inbuatsaih a ngaih thu sawiin, chimralna (assimilation) te pawh lo do let na tur thatak pakhat chu Cooperaive Society nghet taka din a nih thu a sawi bawk. kawnpui Consumer Coopeartive Society chu nghet taka ding tlat a, hma sawn zel a, mi tam takin a zar an zo zel na turin duhsakna a hlan bawk a ni.

Kawnpui Consumer Cooperative Society hi 1967 kum a din niin tun dinhmunah member (share holder) 212 an awm a an mahni pualin RCC building neiin kum 2008 khan India rama Cooperative Society tha bik 15 thlan chhuah zingah a tel a, National Award te pawh dawngin Kolasib District ah kum 20 chhung chu Society tha ber nihna dinhmun a luah a ni. Pu Lal Thanzara hi Mizoram Cooperative Apex Bank, Mizofed leh Society hrang hrang a hruaituten an tawiawm a ni.