State Level Task Force for Immunization Committee chu vawiin ni 29^th September, 2017 hian an Chairman Pu Lalrinliana Fanai, IAS, Secretary, H&FW Department Office Chamber-ah an thukhawm.

He meeting pawimawh takah hian Intensified Mission Indradhanush hlawhtling taka kalpui a nih theihna tura hmalakna te, harsatna awm thei sutkian dan turte leh tul dang ruahmanna awm thei turte Dr. Lalzawni, State Immunization Officer in powerpoint presentation a nei a. Dr. Lalhlimpuii, Surveillance Medical Officer, MPSP-WHO in Intensified Mission Indradhanush (IMI) thlirletna leh Measles-Rubella Campaign neih tur chungchang  sawifiahna a nei bawk a ni.

Intensified Mission Indradhanush thil tum chu Naupang kum 0 – 2 vaccine la la ve ngai reng reng lo, emaw la nial nual la kim lo te zawnchhuah a, vaccine lak tur ang lak kim tir leh nu naupai TT vaccine pek hi a ni. Za a sawmkua (90%) December, 2018 a nei thei ngei tura Prime Minister hmalakna niin Mizoramah pawh 7^th October, 2017 atanga tanin ni 7 chhung thlatin a zawnin thla 4 chhunga nei turin Mizoram District 3 – Lawngtlai, Lunglei leh Mamit ah te inpuahchah mek a nih thu he meeting ah hian tarlan a ni bawk.

He Special Programme hman leh tur hi naupang te leh naupai ten an mamawh zia hriaa a lo hlawhtlin ngei theih nan heti lama mawhphurtute theih tawp chhuaha lo tanpui turin Committee chuan mitinte a sawm bawk a ni. He Special Programme Intensified Mission Indradhanush hi Mizoram biakah chuan District 3 – Lawngtlai, Lunglei leh Mamit huamchhunga thingtlang kal harsa zual leh regular taka vaccine pek theih lohna hmun 109 velah kalpui a ni dawn a ni.