1688/2023-2024

Vawiin khan School Education Minister Pu Lalchhandama Ralte chuan Sakawrdai Community Health Centre-a buatsaih a thlawna inentirna a hmanpui.

Minister chuan Free clinic khuhhawnna CHC tualzawla neihah  thusawiin tun hnaiah Sakawrdai leh a chheh velah dam lo an tam a, Sakawrdai CHC-a Doctor pathum zinga mi MBBS chu dam lohna avangin  phai lamah a inenkawl mek a,  doctor an indaih lova, mipuiin harsatna an tawk tih sawiin a aiawh tur Doctor țha tak dah tum a ni a ti a.  Sakawrdai leh a chheh vel khaw hrang hrangah dam lo an tam avang hian khawtlang hruaitute nen inberawnin he free clinic hi buatsaih a ni a ti.

Minister chuan Tuivawl Constituency huam chhunga khua zawng zawngah PHC, CHC emaw clinic centre emaw awm lohna khua a awm tawh lo tih sawiin hetianga clinic centre nei țha hi thingtlang  bial dangah an vang hle a ni a ti a. Sorkarin hriselna lama a ngaihsaknaah mipuiten lawm nachang hriat a țul thu a sawi.

Minister chuan dam lo mangangte tana inpe  Doctor specialist rualten an clinic kalsana Sakawrdai an pan thei chu lawmawm a tih thu a sawi a, Sakawrdai leh a chheh vel mipuite tan a thlamuanthlak hle a ni a ti.

Dr Vanlalhruaii Obs&Gynae chuan Medical team aiawhin thu a sawi a, dam lo te tana thawk chhuak an nih avangin Sakawrdai CHC a inentir tur dam lo an awm chhung chu an en dawn a, en zo lovin an hawsan dawn lo tih a sawi a, vawiina an en theih bak chu naktuk zingah an chhunzawm leh dawn tih a sawi.

He free clinic-ah hian Aizawl Civil Hospital ațangin Doctor 9 an thawk chhuak a, hengte hi medicine, Hmeichhe lam, kal lam, Dental, ENT leh Naupang doctor te an ni. Doctor-ten a thlawna an en bakah hian dam lote chu a thlawnin  damdawi an pe bawk a ni.

Free Clinic khuhhawnna inkhawm kaihruaitu Pu Sangthankhuma VCP Sakawrdai chuan dam lote tan a thlawna inentirna buatsaih a ni chu lawmawm a tih thu leh doctor rualte chu mipuite tan malsawmna an nih thu a sawi a. Khuhhawnna neihah hian khawtlang hruaitute, Medical team te leh khaw hrang hrang ațanga inentir duh dam lo țhahnem tak an kal khawm a ni.