1083/2026-2027

Aizawl the 19th June, 2026: Aizawl West II bialtu MLA Pu Lalnghinglova Hmar, Minister of State, Sports & Youth Services, etc. ni bawk chuan vawiin khan a bial chhunga sorkar primary school-ah te zirlaite tan school uniform pheikhawk a sem chhunzawm a. Vawiinah hian Govt. Primary School, Kanan; Chhinlung Academy, Vaivakawn; Govt. Primary School, Dawrpui Vengthar; Govt. Tuikual Primary School I, Tuikual North leh Govt. Tuikual Primary School III, Tuikual South-ah te sem a ni.

Minister Pu Lalnghinglova Hmar chuan Mizorama zirtirtu tha berte awmna chu sorkar school a ni a, trained teacher vek an awm a, zirna tha kan nei a ni, a ti. Sorkar school-a luh nachang kan hriat zel a pawimawh a, bial chhung sawrkar school thenkhatah chuan hmunhma in a dawl zawh dawn loh thlenga zirlai lut tur nei an awm a. Hetihlai hian zirtirtute pawhin theihtawp kan chhuah reng a ngai a, miin kan school a rawn luh hi an tum reng angem tih hi kan inzawh fo a ngai, a ti. School hi nungchang kan zir tanna a ni a, thiamna bakah nunkawng inzirtirna tha kan dawng a, sorkar school-te hi a zirna leh thildangte tihhmasawn a tihchangtlun zel kan tum dawn a ni, tiin Minister chuan a sawi bawk.

Aizawl West-II huamchhunga sawrkar primary school zirlaite hnena uniform pheikhawk sem hi June ni 17, 2026 (Nilaini) atang khan neih tan a ni a. Bial chhung school pariatah pheikhawk bun 683 sem tur niin, karlehah school pakhatah sem leh a ni ang.

Bialtu MLA in school uniform pheikhawk a semnaah hian school awmna veng hrang hranga Local Council te leh zirlai nu leh pate pawhin an telpui a ni.