1306/2026-2027

Dated Aizawl, the 6^th July 2026: Vawiin khan Tuikual North MHIP-te chuan MHIP Day vawi 52-na lawmna chu Tuikual North YMA Hall-ah an hmang a. Bialtu MLA leh Minister ni bawk Pu Lalnghinglova Hmar chuan khuallian niin he hun hi a hmanpui.

Minister chuan he hunah hian thusawiin MHIP-te chu midangte tana an inpekna leh chhiatni thatnia an inbuaipui dante chu fakawm a ti a; Mizote tan nu dinhmun chu a pawimawh a, nu tha tak leh fate tana nu nih tling tak hmeichhia an pun zel a duhsak thu a sawi a. Mizoramah hmeichhiate chu an pawimawh a, tun AMC election-ah pawh khan hmeichhe voters chu za zelah 54% vel ang an ni, a ti a. Mizoramah mipa thalai thi an tam lutuk chu pawi a tih thu leh hemi kawnga hma la turin MHIP, YMA leh kohhran khawtlang tanho a ngaihzia a sawi a. Ram leh hnam dinchhuahna atan chuan chhungkuaa inenkawlna a pawimawhzia sawiin Pu Lalnghinglova Hmar chuan nu te chu an pawimawh a, zirna kawnga fate hawitir turin a fuih a. Zirna sikulah pawh sawrkar sikulte chu an duai bik lohzia leh an that tawkzia a sawi a, high school atang mai ni lo primary school atang an fate chu sawrkar sikula dah uar turin kalkhawmte chu a chah bawk.

MHIP Day lawmnaah hian Tuikual North MHIP President Pi Rita Lalparpuii chuan a kaihruai a. Kum 2025-26 chhunga an member boral mi 14-te sunna hun neih niin Tuikual North tihmingthatu leh life member-te chawimawina hun neih a ni a; Hmeithai Association leh Police Welfare Association te chuan thu an sawi a, Tuikual North MHIP Vice-President Pi Lalthachungnungi chuan lawmthu sawinain he inkhawm hi a khar a ni.