490/2026-2027

Dated Aizawl, the 13th May, 2026: Ephraim Higher Secondary School (EHSS) HSLC leh HSSLC 2026 exam-a hlawhtlingte lawmpuina hun Vanapa Hall-a neihah vawiin khan Minister Pu Lalnghinglova Hmar chu khuallian a ni.

Pu Lalnghinglova Hmar chuan zo nun ze mawi - aia upa zah thiamna vawng nung zel turin zirlaite a fuih a. Khawi hmunah pawh kal se, an thinlungah pi pu chena kan rohlu - zo nun ze mawi, aia upa zahna leh mi dangte nena inzahtawnna vawng nung reng turin a chah a ni.

Tunlai internet leh social media khawvela seilian thalaite an vanneih em em rualin, harsatna tam tak erawh an tawk thei, tih sawiin Minister chuan technology leh social media hmang thiam turin a fuih a. Zirlaite chu an hriselna ngai pawimawha, mahni inthunun theihna nei tlat turin a fuih a ni. Pawl 12 pass thar zirlaite hnenah college nun an hmachhawn turah an zirna ngai pawimawh tur te, an chhungkaw dinhmun leh phak tawk hre reng chunga khawsak thiam turin Pu Lalnghinglova Hmar chuan a fuih bawk.

Pianpun tulzia pawh sawiin Minister chuan India rama nau piang zat fertility rate chu 2.1 a nih laiin Mizoram chu 1.87 chauh a ni a; India ram mipui zawng zawng za zela chhutin Mizoram population chu 0.09% chauh kan nih thu leh kan population hniam lutuk hian Mizo hnam dinhmun a nghawng nasa dawn nia a hriat thu a sawi a. Hemi kawngah hian tunlai thangtharten rilru thar kan put a pawimawh hle a ni, Minister chuan a ti.

Pu Lalnghinglova Hmar chuan Ephraim Higher Secondary School atanga HSLC leh HSSLC pass percentage 100% an nei chu ropui a tih thu a sawi a. Hlawhtlinna chang zirlaite chu lawmpuiin, an kal zelna turah duhsakna a hlan a ni.

Ephraim Higher Secondary School HSLC leh HSSLC 2026 result chu hetiang hi a ni: HSLC-ah zirlai 163 an exam a, 163 ten hlawhtlinna changin pass percentage 100% an nei a, English subject topper Joanna Lalzuimawii an nei bawk. HSSLC Arts stream-ah hian zirlai 99 an exam a, 99 ten hlawhtlinna changin pass percentage 100% an nei a ni.

Vawiin hunah hian EHSS Principal Pu MS Dawngliana chuan khuallian te, mikhual sawmte leh zirlai hlawhtlingte a lo lawm a. School-in 100% pass percentage an neih theihnaah zirtirtute, nu leh pate leh zirlaite thawhhona rah a ni tiin, lawmawm a tih thu a sawi bawk.

He hunah hian hlawhtlinna chang zirlaite hnenah Incentive Cash Award sem a ni a. EHSS Lecturer Pu Vanlalengmawia’n lawmthu sawiin hun a khar a ni.