491/2026-2027

Dated Aizawl, 13th May, 2026: Vawiin chawhnu khan "Mizoram Labour Link" Mobile App chu  Labour, Employment, Skill Development and Entrepreneurship (LESDE) Department changtu Minister Pu Lalnghinglova Hmar chuan LESDE Auditorium, Directorate Office, MINECO- ah a tlangzarh.

Minister Pu Lalnghinglova Hmar chuan khawvel thiamna ṭhangzel ban pha tur leh tel ve thei tura Mizoram mipuite tana ṭangkai tur Mizoram Labour Link Mobile App a tlangzarh thei chu lawmawm a ti a. Tunlai khawvel intlansiakna ber, hmasawna min thlentheitu ṭangkai tak ni bawk chu Digital Infrastructure hi a nih thu sawiin, “Mihring thiamna tihpunna chu Digital World-ah a awm a ni”, a ti. Mobile App tlangzarhnaah Press mite leh MJA hruaitute an lo tel thei chu lawmawm a tih thu sawiin, he app an tlangzarh chhan, a hmangtu tur takten he app an hman ṭangkai theihna turin a thehdarhna kawngah Press mite hma la turin a sawm a. Hnathawktu hnufual zawkte leh hmun kilkhawra awmten an hriat a, an hman ṭangkai theih nana awareness campaign nei turin a chah bawk a ni.

Mizoram Labour Link Mobile Application hi ni tin inhlawhfa thinte (Daily Labourer/Workers) leh a chhawrtu tur (Employer) indawr tawnna tur (Digital Platform) atana duan a ni a. He application in a tum ber chu:

1. Pawnlam mi (middle men) inrawlhna tih tlem.

2. Hnathawh tur zawnga hmun him lo laia Workers/Labours-te fuankhawmna tih bo.

3. Ni tin inhlawh thinten an thawh hlawh dik tak (fair wages) langtlang taka an hmuh theihna tura duan a ni.

He application hi a hmangtuin awlsam taka an hman theih tura duan a ni a, hna zawngtute leh a chhawrtuten awlsam takin an smartphone kaltlangin direct service an hmu thei dawn a ni.

Mobile Application tih theih thenkhatte:

4. Hna zawnglai (worker) leh a chhawr theitu tur (employer) inziahluh theihna.

5. Hna tarchhuah (job posting) theihna leh dil theihna.

6. SMS leh Push Notification hmanga inhriattir theihna.

7. Hna zawngtu leh hnathawh tur neitu inbiakpawh theihna.

8. Awmna hmuna zir (location based), leh thiamthil bik (skill based) a zira hna zawnna leh tarlanna.

9. Mobile application hmangtu account nemnghehna leh venhimna (user authentication & authorization).

He platform hi mobile application chauh ni lovin, Mizorama nitin inhlawhfa thinte leh a chhawrtute indawrtawnna awlsam zawk leh technology-driven labour ecosystem dinna tur lungphum a ni a. He application hi tihchangtlun chhoh zel tura ruahman a ni.

He Link hi ni tina inhlawhfa thinten hna an zawn/hmuh theihna tur leh hamthatna an dawn theih angte an hriat theihna tura duan niin hmun kilkhawr ber bera awmte tan pawha awlsam taka an hman tangkai theih tura duan a ni.

He platform hi employer-te leh hnathawh tur zawngte inkara inzawmna ṭha zawk siam tumna a nih bakah Mizoram sawrkarin digital governance a tihchangtlun lehzualna tur atana hmalakna a ni.

LESDE department  buatsaih Mobile App tlangzarhna programme-ah hian LESDE Director Pu John Ṭanpuia'n technical report pein,  Mobile App hnathawh dan tlangpui a tarlang a. Joint Labour Commissioner Pu Vanlalawmpuia chuan lawmthu sawiin a khar a ni.