492/2026-2027

Kolasib, 13th May, 2026: Vawiin chawhma dar khan DC Conference Hall, Kolasib-ah Kolasib Deputy Commissioner Pu H. Dolianbuaia hovin Solid Waste Management Rules, 2026 kalpui dan tur leh a kaihhruaina (Road Map/Framework) siam turin thutkhawm a ni. He thutkhawm hi sawrkar lehkha pawimawh in a phut anga koh a ni.

Thutkhawm kaihruaitu DC Pu H. Dolianbuaia chuan, Mizoram puma faina inelnaah Kolasib district chuan pakhatna a nih theih ngei a beisei thu sawiin, hemi a nih theih nan hian theihtawp chhuahin a theih ang angin tangho vek ila a ti a. Tuna bawlhhlawh paih dan kalpui mek chu a tha tawk em, tih leh tihdan dang hmasawnna tur awmte sawiho turin kalkhawmte chu a sawm a ni.

Kalkhawmte chuan ngaihdan leh harsatna awm thinte thawhkhawmin, bawlhhlawh paih dan kalphung a inthlak zin deuh thin thu leh, mipuite hnenah inzirtirna kalpui thin mah se, a hman tak tak dawn veleh ruahmanna dang a lo awm leh thin avangin, mipui ten awlsam leh felfai zawka an zawm theih tur ruahmanna fumfe tak neih a ngaih thu an sawi a. Hemi rual hian bawlhhlawh lakkhawmna motor pawh tuna hman mek ai hian tam zawk awm thei se an duh thu an sawi lang bawk a ni.

SWM Road Map tharin a phut angin, bawlhhlawh sawngbawl leh tifai hna hi District Urban Development Officer (DUDO), PHED leh Block Development Officer (BDO) ten anmahni huamchhungah an vil (supervise) ang a. He ruahmanna thar enchhinna (Pilot Project) hi Bilkhawthlir leh Thingdawl-ah te kalpui nise tiin, project Coordinator atan hian Project Director, Rural Development (RD) ruat a ni.

Solid Waste Management Rules 2026 hi kumin April ni 1 atanga hman tan a ni a, kum 2016-a dan hlui hman thin chu a luahlan a ni. He dan tharah hian DC chu Chairman a ni ang a, bawlhhlawh paih tur te hi chi li (4) a thliar (segregate) ngei ngei tur a ni. He dan thar hlawhtling taka kalpui a nih theih nan mipui zirtirna (IEC) kawngah nasa zawka tan lak a ngai dawn a ni. He dan thar hian faina tluantling neih a nih theih nan bawlhhlawh sawngbawl dan changkang zawk a kawhhmuh a; mipuite hriselna humhalh leh kan vela leilung, tui leh boruak tha lo tur venhim na a dah pawimawh hle. Vawiin thutkhawmna ah hian heng ruahmanna siam tharte leh hmabak la awmte hi hun remchang hmasa berah sawiho leh nise tih a ni bawk.

 Solid Waste Management Rules, 2026 kalpui dan tur chungchang a thutkhawmna ah hian Project Director (DRDO), District Urban Development Officer (UD&PA), Executive Engineer (PHED), District Local Administration Officer, DIPRO Kolasib leh Kolasib Town chhunga Village Council aiawhte an tel kim hle.