493/2026-2027

Dated Aizawl: the 13 May 2026: Vawiin khan Mizorama Science NGO upa ber Mizoram Science Society (MSS) chuan Aizawl Hospital- ah, Mizorama a hmasa ber atan Mizoram Science Award chu Dr. L.N. Tluanga, Mission veng hnenah a hlan a ni.

Mizoram Science Award hi mizote zinga science leh a kaihhnawih lama khawtlang leh ram tana hnuhma nei tha te, scientific research lama mi hming tha leh thawhhlawk te hnena hlan thin tura Mizoram Science Society(MSS)-in a duan niin a dawng hmasa ber tur atan Dr. LN Tluanga hi thlan a ni a. He Award hian tangkafai Rs 50,000/- keng telin, Dr. LN Tluanga hi a taksa a chak loh ve deuh tawh avangin Aizawl Hospitalah enkawl mek niin chawimawina Award pawh hi damdawi inah hian MSS hruaitu ten an hlan a ni.

 Dr. LN Tluanga hi kum 1933 khan Bukpui khuaah lo piangin, Sialsuk leh Aizawlah te a naupan laiin  lehkha a zir a. BSc hi Scottish church College atangin 1955 khan Mathematics subject-ah Distiction-ah  a passed a. BSc a passed hnu hian Sikulah kum 1 thawkin MSc a zir chhunzawm leh a, a hnu deuh  kum 1974 khan Gauhati University hnuaiah PhD zovin Mizo zinga Mathematics subject-a PhD nei  hmasa ber a ni nghe nghe a. Mizoram sawrkar hnuaia Education Director hmasa ber niin a hnu lamah  pawh Education department hnuaiah vek hian Consultant/Adviser hna a chelh leh bawk a ni.  Science tih hmasawnna kawngah nasa taka thawktu niin Mizoram Science Society pawh hi ama hova  kum 1979-a din a ni nghe nghe a ni.