1659/2026-2027

New Delhi, the 5th of August, 2026: New Delhi-a cham mek Pu Lalnghinglova Hmar, Minister of State (i/c), Sports & Youth Services, Tourism etc. chuan vawiin khan Ministry of Development of North Eastern Region (DoNER) hotute a kawm a, Ministry hnuaia Mizoram project hrang hrangte chak zawka kalpui dan tur sawipuiin, hmasawnna kal mek leh hmachhawpte an sawiho.

Tourism Minister Pu Lalnghinglova Hmar chuan Pu Katikithala Srinivas, Secretary, MDoNER chu a office-ah kawmin, Mizoram sawrkar hmachhawp hrang hrangte DoNER Ministry kaltlanga hma lak theih dan an sawidun a. A bikin sports leh tourism-a hmachhawpte tarlangin Minister chuan, “Aizawl hi India ram thlasik khawpui ni thei turin hma kan la mek a, December thlaah Winter Festival lian tham buatsaih kan tum. Kan theihnain a tlin piahlamah chuan Ministry puihna kan mamawh dawn a ni.” a ti a. NESIDS-OTRI hnuaiah Mizoram combat sports zawng zawngte hman theih tur ‘Centre of Excellence’ project sanction a ni chu lawmawm a tih thu a sawi bawk.

DoNER Secretary chuan a theihna apiangah Mizoram pui turin Ministry a inpeih tih a Minister chu a lo hrilh a. “Mizoram chu ziak leh chhiar tamna, sik leh sa nuam leh hmun mawi tak a ni a. Zirna in tha din leh a awmsate tichangtlungin, ‘education hub’ ni turin theihna a nei, tiin, state pawn atanga zirlaite’n an pankhawm chuan khawtual mite eizawnna leh state economy thlengin a hlawkpui theih tur thu Minister nen an sawidun a ni.

Minister chuan DoNER Ministry hnuaia Tourism project thehluh chungchangah a buaipuitu Dr. Vipul Aggarwal, Joint Secretary leh Pu Dharmvir Jha, Statistical Advisor te pawh vawiinah vek kawmin, project dinhmun leh state sawrkar atanga hmalak ngai awmte sawipui a, bawhzui ngaite an bawhzui nghal a ni. Mizoram football hmasawnna tur project thehluh tawh dinhmun pawh an sawiho nghal bawk.

Sports Minister ni bawk Pu Lalnghinglova Hmar hian NESIDS-OTRI scheme hnuaia ‘Boxing Centre of Excellence’ sak tur chungchangah scheme enkawltu Pu Silabhadra Das, Deputy Secretary pawh kawmin, chak zawka hmalak dan tur a sawipui nghal a ni.

Contact sports hrang hrang hmunpui ni thei tur, cheng vaibelchhe 38.4 senga sak tur Centre of Excellence hi May 19, 2026 khan sanction a ni a, tunah hian tender chhuah tura buaipui mek a ni.

Meeting-ah hian Minister hi Pu H. Lalramenga, PS in a tawiawm a ni.