Vawiin khan Labour, Employment & Industrial Training Minister Pu Lalrinmawia Ralte chuan P.C. Training Institute, Delhi-a mi 70 rual training a kal turte Tennis Court-ah a vai liam. P.C. Training Institute hi Mizoram Youth Commision (MYC) leh Labour, Employment & Industrial Training (LE&IT) Department tangkawpin an buatsaih Mizoram Skill Fest, 2014-a Vocational Training Providers (VTP) lo kalte zing ami a ni a. Kal turte thlahna hun hi MYC Chairman Pu T. Sangkunga’n kaihruaiin, MYC Secretary Pu J.T. Vanlalngheta leh LE&IT Director Pu Rotluanga ten an telpui bawk.

Thlahna hun tawi neihah hian Minister Pu Lalrinmawia Ralte chuan training turte chu taima leh huaisen taka awm turin leh chhawrtlak thiamna an zirchhuah a beisei thu a sawi a. Zirtirna petu tur ten an theihtawp an lo chhuah dawn bawk a, nun uluk tak chungin hlawhtling taka training chhuak turin a fuih a ni.

P.C. Training Institute-ah hian training sector hrang hrang a awm a. Mizo thalaite hi Banking & Accounting Sector, Information & Communication Technology (ICT), Logistics, Business & Commerce, Retail, Sales & Marketing, Insurance leh Travel & Tourism-ah te training pek an ni dawn a ni.