Health Minister Pu Lal Thanzara chuan vawiin chawhnu khan United Pentecostal Church (North East India), Aizawl East District-ina an Pawl hmunpui Ramhlun South Conference hall-a Pastor leh Rawngbawltute tana vaihlo leh a khaihhnawih chungchangah zirtirna ‘Thianghlimna Trainers’ Training an bautsaih chu a hmanpui.
Health Minister Pu Lal Thanzara chuan UPC(NEI) in a Kohhran anga vaihlo leh a kaihhnawih chungchanga rawngbawltute tana training an buatsaih chu fakawm a tih thu a sawiin Kohhran mite hnenah heng an zir te an zirtir chhawn chuan zuk leh hmuah dona kawngah rah duhawm tak a chhuah ngei a beisei thu a sawi. Kohhran mite, Isua hnung zuitu tena kan hriat a pawimawh chu khawvel awm chhung hian zuk leh hmuam, zu leh ruihtheih thil te hi dah bo in a awm dawn lova amaherawhchu a chiah piah chungin heng thil lakah Ringtute kan inthiarfihlim hi Pathianin min beisei tlat a ni, a ti.
Zuk leh hmuam chungchanga Mizoram dinhmun a sang hle leh hemi avanga kan hrisel lo em em te hi Ringtu kan nihna zawn atang pawha zah na chang ka hriat a, Pathian lakah inthlahrun na chang kan hriat a ngai a, chuvangin heng thil a fihlim tur chuan tan lak ho a tul a ni, a ti. Sawrkarin ram hmasawnna atan thil hrang hrang a kalpui thusawiin hma kan sawm dawn chuan mipuite hi kan hrisel that a pawimawh bera hriselna hian hma sawmna chu thui tak awmzia a neih tir thei a ni,a ti bawk.
Thianghlimna Trainers’ Training hi nilenga neih niin Rev. R. Lianzama’n a kaihruai a. Mithiam pali hnen atangin thusawi leh an presentation te ngaihthlak a ni a. Dr. Jane Ralte, State Nodal Officer, Mizoram State Tobacco Control Society(MSTCS) chuan ‘Vaihlo leh a kaihhnawih chungchang a hriattur pawimawh te’ a sawi a. Pu R. Lalremruata, Project Co-ordinator, MSTCS in Vaihlo khuahkhirna Dan (COTPA) chungchangte, Rev. Dr. F. Sangkima’n Kristianna leh zuk leh hmuam chungchang te leh Upa Saimawia, President, Tobacco Quitters of Mizoram in Vaihlo bansan duh te tana hriattur pawimawh te an sawi a ni.
Vawiin Training ah hian UPC(NEI) Pastor engemawzat leh Kohhran rawngbawltu 100 chuang an tel a ni. Training ah hian zawhna leh channa hun te pawh hman a ni bawk.
