Railway Budget 2014-15 chu Minister of Railways D.V.Sadananda Gowda chuan Parliament-ah vawiin khan a pharh. Passenger-te sahimna ngaihtuah leh an tana awlsamna siamsak te, a hun taka project tihpuitlin leh sum leh pai hlawk zawka thawhchhuahte chu he budget-a ruahmanna siam langsar zualte an ni a. Kum 2014-15 chhungin Railways kaltlangin cheng vaibelchhe 1,64,374 hmuh beisei niin cheng vaibelchhe 1,49,176 hmanral tura ruahman a ni.
Budget thar vawiina pharh takah hian hmarchhak state hrang hrangah Railways kaltlanga Eco-tourism leh Education Tourism a hmalakna tur ruahmanna thar siam a ni a, North-East State te pualin cheng vaibelchhe 5,116 dah a ni. Hei hi kum kalta aiin za zelah 54 in a pung. Railways Minister D.V Sadananda Gowda chuan North East ah project 23 kalpui mek a nih thu leh heng zinga 11 te chu National Project a nih thu a tarlang. Kum 30 chhungin ram pumah project 676 sanction niin heng project-te hlutna hi cheng vaibelchhe 1,57,883 a ni a. Tun dinhmunah project 317 chauh zawh fel a la ni a, project 359 zawhfel loh a la awm. Project te a hun taka zawh thuai a nih theih nan Project Management Group leh Monitoring & Coordination Group din a ni ang.
E-ticketing changtlung zawka kalpui tum a ni a, tun dinhmunah minute khata ticket 2000 book theih chu 7200 ah tihsan a ni ang a, a rualin tum khatah mi 1,20,000 in an hmang tangkai thei dawn a ni. Mobile phone leh post office kaltlanga ticket lei tihlar tum a ni a, coin hmanga awlsam taka ticket lei theihna Coin Operated Automatic Ticket Vending Machine pawh enchhin tum a ni bawk.
Mumbai-Ahmedabad sector-ah train tlan chak chi Bullet Train tlan tir tum a ni a, sector thlanbik - Delhi-Agra, Delhi-Chandigarh, Delhi-Kanpur, Nagpur-Bilaspur, Mysore-Bengaluru-Chennai, Mumbai-Goa, Mumbai-Ahmedabad, Chennai-Hyderabad leh Nagpur-Secunderabad-ah train tlan mek te hi 160-200 kmph thlengin an speed tihsan a ni ang. Train thar 58 tlan tir tum a ni a, chungte chu - Jansadharan Trains 5, Premium Trains 5, AC Express Trains 6, Express trains 27, Passenger train 8, Mainline Electric Multiple Unit(MEMU) services 2 leh Diesel multiple unit (DEMU) services 5 te an ni.
Train-a zin thinte an lo him zawk nan Indian Railway Protection Force (RPF) Constable 17,000 lak an ni a, hmeichhe RPF Constable 4000 la turin ruahmanna siam a ni bawk. Passenger-te’n harsatna an tawh palha awlsam taka koh an nih theih nan RPF te hnenah hian mobile phone pek an ni ang.
Train-ah ei leh in thianghlim leh tui zawk sem tum a ni a, station lian deuhah Food Court siam a ni ang. Train leh station te a lo thianghlim zawk nan budget tharah hian kum kalta aia za a 40 zeta pungin ruahmanna siam a ni a, station lian zual 50-ah mimal company te rawih an ni ang.
Zinmite’n train-a chuang chunga hna an thawh chhunzawm theih nan A1 leh A category station leh train thenkhatah wi-fi dah a ni dawn a, passenger-te a hun taka kaitho tur wakeup call system te, an chhuk hun tur hrilh thei destination arrival alert te, kum upa tawh te leh rualbanlote hman tangkai theih tur battery-operated cart te dah a ni ang a. Railway platform tinah chawlh hahdamna, ek in leh tui intur hnianghnar tak chhawp reng tum a nih bakah train thlan bik thenkhatah man chawia hman theih tur workstation te dah tum a ni bawk.
