Vawiin khan Labour, Employment & Industrial Training Minister Pu Lalrinmawia Ralte chuan a pisa-ah MYC Chairman Pu T. Sangkunga leh MYC Secretary Dr. J.T Vanlalngheta hovin Emporium Training & Consultancy Pvt. Ltd., Kolkata hotute nen inkawmna hun a hmang. Emporium Training & Consultancy hotute chuan kumina an institute-a training tura Mizo thalai tirhchhuah batch hmasa ber nula 39 rual zinga mi 30 chuan hna an hmuh tawh thu a sawi a ni.
Minister Pu Lalrinmawia Ralte chuan Mizo thalaite tan hna tha leh chhenfakawm hmu tura ruahmanna siamten rah an chhuah tan zel chu lawmawm a tih thu a sawi a. Training institute hotute hnenah chuan trainee-te hma ngaia, hna zawn sak chungchangah pawh fimkhur taka an buaipui a beisei thu a sawi a ni.
Emporium-a an Manager Pu Anirban Mukherjee chuan khawvel huapa inzarpharh company ngei nen inthlunzawmin, heng company hriatchian leh hriatlarah te hian trainee-te tan hna an zawnsak thin thu a sawi a. Tuna trainee-te hna hmuhnate pawh hi five-star hotel-ah vek a niin, tha taka kum hnih chhung an thawh chuan ram pawnah an la thawk mai ang, a ti a. Pu Mukherjee chuan ram pawna thawh chungchangah trainee-ten Pan Card leh Passport an neih remchanloh thin avangin awlsam taka hna hmu thei turte an kal theihloh phah thin a ni, a ti bawk. Hindi a tawng harsat avangin Mizo thalaiten hna hmuh kawngah, a bik takin aviation lamah harsatna an tawh thin thu leh, chumi harsatna sukiang tura an tan special spoken Hindi class an siam sak thu Emporium hotute hian an sawi bawk.
MYC leh Emporium Training & Consultancy-ten kumin January ni 30, 2014-a Mizo thalai 250 hnenah training pe a, hna hmuhsak nghalna tur thuthlung an ziah hnu-ah Mizo thalai 127 he hmunah hian tirhchhuah an ni tawh a. Batch hmasa ber atanga hna hmu tawh mi 30-te hi course zawh hma a hmu an ni a, midang tan interview hi kalpui zel a ni bawk. ITC Rajputana, Westin Hyderabad Mindspace, Westin Sohna Resort & Spa leh hotel dang dangah trainee-te hian hna an hmu a ni.
Skill Development Initiative Scheme (SDIS) hnuaiah Emporium Training & Consultancy, Kolkata mai bakah NIPS (Kolkata), O2 (Hyderabad), Ananda Spa (Hyderabad), IQST (Guwahati), PC Training Institute (New Delhi), LBIIHM (Delhi), Learn to Earn (New Delhi) leh NIAS (Kolkata)-ah te training turin Mizo thalai 1,200 chuang tirhchhuah an ni tawh a. Training petu ten an zir zawhah hna an zawnsak nghal dawn a ni. Training senso hi Directorate General of Employment & Training, Ministry of Labour & Employment atanga hmuh a ni.
