Vawiin chawhnu khan Land Revenue & Settlement Department officer te chuan an Minister Pu Lalruatkima hovin Revenue Directorate Conference Hall-ah inhlantharna neiin an hmachhawp hrang hrangte an sawi ho.

Meeting hi LR&S Director Pu K Lalhmingliana'n a kaihruai a, Department Minister Pu Lalruatkima'n Inhlantharna a hmanpui thei chu lawmawm a tih thu a sawi a. Department hnathawh hrechiangtu Minister an nei chu an vannei thu sawi bawkin, Department hmasawnnan thawktute kutah thuitak a innghah thu leh thawhona tha angaihpawimawh thu a sawi a ni.

Minister Pu Lalruatkima chuan kum khat chhung hna an thawhho tawhnaah lawmthu sawiin thawhhona tha hnuaiah lo chuan hmasawnna a thlen theih loh thu a sawi a. Thawktute chu Kumthar Chibai bukin Kum bul an tan leh turah pawh a hma aia tang sauh sauh turin a chah a ni.

Minister Pu Lalruatkima chuan Revenue Department chu sorkar ram enkawltu a nih thu sawiin sorkar ram bakah chhungkua zawng zawng file kawltu an nihna lai a awm vangin In hmun leh ram buai tam tak chinfel ngai a awm thu a sawi a. Revenue Department hnathawh danah thawktu indaihlohna avangin mipui lam atangin Department duh khawp lohna a ri thin tih sawiin Minister chuan Surveyor 130 chuang post awm-ah mi 50 bawrvel thawktu an awm a ni, a ti a. Thawktu in daihlohna hi sorkarin a hriatpui thu sawiin post mamawh zual bik te chu hnawhkhah dan dap anih thu a sawi bawk a ni. Minister Pu Lalruatkima chuan Revenue Department Officer te chu an hnuaia mi te entawn leh innghahna an nih avangin infinchhuah zel turin a chah bawk a ni.

Sorkar Flagship Programe SEDP hnuaiah kut hnathawktu te ram enkawl dan tur leh a thenfel kawngah pawh kumin atang chuan beihpui thlak angaih tur thu sawiin Minister Pu Lalruatkima chuan hmanraw in daih lohna leh mamawh te chu ngaihtuah anih tur thu sawiin tunlai thiamna hmang phak tura in tuai hriam reng turin officer te a chah bawk a ni.

He hun hi Pu Rochhunga Ralte, Ex-MLA, LR&S Secretary Pu R.Lalramnghaka te bakah, midangte te an tel a ni.