State Council for Educational Research and Training (SCERT), Mizoram, kum 40 tlin champhaphak Ruby Jubilee chu vawiin khan SCERT Office, Chaltlangah lawm a ni a. Education Minister Pu Lalchhandama Ralte leh Human Resource Development Board Vice Chairman Pu L.Thangmawia ten an hmanpui. SCERT hi January 20, 1980 ah Education Department hnuaiah Joint Director kaihhruainain a ding tan a ni.

SCERT kum 40 tlin lawmna programme-ah Pu Lalchhandama Ralte chuan SCERT-in tun dinhmun a thlen theihna tura sulsutu leh thawkrim te zawng zawng chungah lawm thu a sawi a. Thangthar lo la awm zel turte tan rohlu hnutchhiah tum theuh turin kalkhawm te a fuih. Education Minister chuan Mizorama zirna kal zel dan turah SCERT a pawimawh a, mi puitling ni tura zirlaite chhertu Human Resource Development hna thawk tute an ni tih inhre reng turin a chah a. Hmasawnna ruhrel lian tham tak tak din hi hmasawnna ni bawk mahse zirna in hma a sawn loh chuan hmasawnna tluantling a ni thei lo, a ti. Education chu department lian tak, peng pawimawh tak tak nei a ni a, tum thuhmun neiin, in dipdal lova kal thiam a pawimawh, a ti. Elementary level-ah SCERT chu thuneitu (academic authority) an ni a. Naupang te zir tur curriculum an buatsaih apiangin Mizo culture leh nunphung te naupangten an thanlenpui theih nan Mizo nunmawi, aia upa zah thiam, awm dan mawi te zeh tel dan ngaihtuah thin turin a chah bawk.

Education Minister chuan Mizoram topper te rampum intihsiaknaah dinhmun sang an hauh hlei theilo te, zirtirtu train chhuak tha tak tak awmna sawrkar school aia private school-in result an nei tha zawk thin te hi inenfiah a tul hle, a ti a. CCE ah exam awm lova pawl sawn ngei ngei thin pawh tidanglamin a that zawk beiseiin promotion exam awma kumin academic session atanga kalpui a nih tak thu, Pu Lalchhandama chuan a sawi a. He State tana tha ber tura kan kal a pawimawh tiin zirna lama mithiamte thurawn dawngsawng tura an inhawn reng thu a sawi bawk.

Khual zahawm Pu L.Thangmawia chuan jubilee hmangtute chibai bukin kan hna thawhna theuhah Mizo hnam tan kan thawk tak tak em tih inzawt turin a chah a. Sawrkar hian kan tih theih chin bak ti turin min beisei lo,; kan ram leh kan hnam tan kan tih theih tawk kan ti em tih inngaihtuah a ngai, tiin mahni hna chanpual leh mawhphurhna zawn theuhah theihtawp chhuah turin Jubilee lawmtute a fuih a ni.

Ruby Jubilee lawmna programme hi zing dar 11ah tanin jubilee meichher chhit te, jubilee balloon thlawh chhuah tir leh jubilee cake zaia bul tan a ni a. Education Minister Pu Lalchhandama Ralte leh MLA Pu L Thangmawia te bakah SCERT a thawk thin pension tawhte leh la thawk mekten jubilee dar vawi 40 an khawng a ni. SCERT auditorium a programme buatsaih chu Education Commissioner and Secretary Pi Esther Lal Ruatkimin kalkhawmte lawmna thu sawia bul tanin he Department tana sulsutu mi pawimawh engemawzatin thu an sawi. Kum 1980 atanga kum 2020 chhunga SCERT a thawk thi ta te sunna hun hman a ni bawk.