Chief Minister Pu Zoramthanga chuan vawiin tlai khan New Delhi ah Civil Aviation leh Housing and Urban changtu Union Minister Pu Hardeep Singh Puri chu a pisa ah Mizoram mamawhte sawipuiin a hmu.

Chief Minister chuan Lengpui airport tihchangtlun hna thawh leh a enkawlna chungchang Civil Aviation Minister hi a sawipui a. Mizorama thlawhna service tam zawk a awm theih nan leh mipui mamawh phuhruk tura hmalakna hrang hrangte sawiin, chung zingah chuan sawrkar laipui atang pawhan rawtna an lo dawn tawh angin state sawrkarin Aviation Turbine Fuel (ATF) atanga chhiah a lak zat tihniam turin hmalak mek a nih thu a Union Minister hi a hrilh a. Lengpui Airport enkawl chhunzawm zelna turah Airport Authority of India (AAI) leh state sawrkar ten mawhphurhna an insem chu state economy dinhmun thlirin ennawn leh nise tiin Chief Minister in rawtna a thlen chu Union Minister chuan tha tih puiin, sawrkar laipui a Aviation hotute leh Mizoram sawrkar chu hemi atan hian ruahmanna siam a bawhzui nghal turin a ti a ni.

Lengpui Airport tihchangtlun hna thawh chin sawi bawkin Chief Minister chuan Hmunpui tlangchhip a DVOR dah belh hna thawh mek chu thla hnih hnu ah zawh beisei a nih thu te, thlawhna park-na (Apron) zauh hna chu a chanve aia tam thawh a nih tawh thu leh Isolation Parking Bay siam chu 70% zawh a nih tawh thu te a sawi a. Airport hungna (perimeter fencing) siam pawh estimate puahchah zawh veleh state in a thawhna tur sum a pek tur thu a sawi bawk.

Chief Minister hi Planning Vice Chairman Pu H. Rammawi, Principal Consultant,  Aviation Wing Pu J. Lalhmingliana, PWD Engineer-in-Chief Pu K. Lalsawmvela, Planning Secretary Dr. Vanlalramsanga, PHED Secretary Pu Amjad Tak leh official dangten an tawiawm a ni.