Tukin khan Serchhip District chhunga (Zeng hri danna pek) Intensified Pulse Polio Immunisation Programme 2020 hawnna inkhawm tawi Serchhip District Hospital tualah neih niin, Bawrhsap Dr. Lalzirmawia Chhangte, IAS chuan khuallian niin a hawng.

A hawnna inkhawm tawi buatsaihah Dr. Lalzirmawia Chhangte chuan, kan hamthatna tura sawrkarin min buatsaih sak te hi a hlawhtlin theih nan ram mipuite kan pawimawh thin a. Vawiina Zeng hri danna vaccine te pawh hi a la tura ruat naupang kum 5 chin hnuai lam zawng zawng ten kokim taka an lak ngei a pawimawh a, Zeng natna vei hnua inenkawl tum ai chuan tuna lo inven lawk hi a tha zawk hle a ni, a ti a. District chhunga he vaccine la thei chin ten kim taka an lak vek theih nan khawtlang hruaitute, tlawmngaipawl leh nu leh pa te chu thawhpuiah a sawm a ni. Thu a sawi zawhah Bawrhsap hian vaccine pein he IPPI Programme hi a hawng nghal a ni.

IPPI Serchhip district hawnna inkhawm tawi hi Dr. Laldawngliana Sailo, Chief Medical Officer chuan a kaihruaia, Zeng hri chu India ram atanga umbo a nih tawh thu leh; kan ram thenawma a la awm avanga inven zui zel nana vaccine te chu kalpui zel a nih thu a sawi a. District chhung khaw tinah Booth siam niin tukin atang hian pek tan an ni a, ASHA te, Anganwadi Workers te leh Health Department thawktute tanghovin a dawng tur naupang ten kim taka an dawn ngei nan ruahmanna siam a nih thu a sawi a ni.

He hunah hian Dr. ZD Lalmuanawma, Medical Superintendent, Dr. Lalhlunpuii, DIO leh thawktu dang te, media mite leh vaccine la tur naupang te an tel a ni.