3673/2022-2023
Aizawl the 24th February, 2023 : Vawiin khan National Institute of Rural Development & Panchayati Raj, Hyderabad leh State Institute of Rural Development & Panchayati Raj, Mizoram tangkawp buatsaih 30 Days Training Course For Social Audit Resource Persons chu Rural Development Minister Pu Lalruatkima hovin a kharna hun hman a ni.
Rural Development Minister Pu Lalruatkima chuan NIRD&PR leh SIRD&PR lama thawktute leh a hmuna training kal zawng zawngte chibai a buk a. He training, ni 30 zet chhung awh chu a hmawr bawk tur a lo ni chu lawmawm a tiin; Training buatsaih sak tu – Ministry of Rural Development, Government of India hnuaia din, National Institute of Rural Development & Panchayati Raj, Hyderabad hotute, he laia training lo buatpuitu State Institute of Rural Development & Panchayati Raj, Mizoram hotute bakah a tul anga hma la char char tu Social Audit Unit, Mizoram te chungah lawmthu a sawi a ni. Social Audit hi scheme leh Programme ten thawh a tum ang taka sum leh pai lo kal chu thawh a ni ta reng em, tih leh engtiang takin nge mipuiin an hlawkpui tih mipui (beneficiaries) leh a thawktu (implementing agency) bakah sorkar hnathawk (official) ten a hmun ngeia an endik a, thil felhlel awmte chawpchilh taka an siam fel/tih dik nghalna hi a ni a ti a. Mizo ten Social Audit kan hmelhriat tanna chu kan rama Ni za inhlawhna kan tih mai, Mahatma Gandhi National Rural Employment Guarantee Act, 2005, kum 2006 tawpa a lo chhuah tan khan a ni a ti a. Minister chuan People's Participation, Transparency leh Accountability te hi sorkar tha dinna kawnga thil pawimawh pathum te an ni a, Social Audit tha taka neih hi sorkar tha neihna kawng pawimawh tak a ni tiin a sawi. Minister chuan Social Audit chuan a dawngtute hnenah public sector programmes te chu thuneihna a pe a, ruahmanna siam kawngah te, a tihhlawhtlin kawngah te, a hnathawh kawngah leh a en dik kawngah tha takin hna a thawk a ni a ti bawk.
Ministry of Rural Development hnuaia Centrally Sponsored Scheme hrang hrang - Pradhan Mantri Awaas Yajona-Gramin (PMAY-G))-ah te, National Social Assistance Programme (NSAP) Guideline, 2014 ah te, National Rural Livelihood Mission (NRLM) & Ajeevika Skill Guideline, 2013 ah te, Pradhan Mantri Krishi Sinchayee Yajona-Watershed Development Component (PMKSY-WDC) v2.0 2021-ah Social Audit ngai pawimawh tur leh ti turin state sawrkar a ti a. Heng bakah hian Centrally Sponsored Programmes hrang hrang, Mid Day Meal (PM Poshan), National Food Security Acts, 2013 te leh thil dangah pawh Social Audit pawimawhna hi tarlan niin, ti ngei tura tih a ni bawk a ni a ti a.
Rural Development Department a thawktute thahnem ngaihna a zarah Social Audit pawimawhna leh thatna te hi zirchiangin 27.7.2012 khan Directorate hranin an lo din daih tawh a, tangkai takin Mizoram mipuiin kan chhawr mek a, North East a, anih dan tur ang taka Social Audit Unit din hmasa ber kan ni bawk a ni a ti a.
Pu Lalruatkima chuan Social Audit hi a pawimawh si a, heta thawk tur hian senso tlem si, tha si a kalpui dan tur zawngin thalai lehkhathiam te training uluk taka pek a, rawih an nih chhung a lawmman tha tak pek hi kan sum leh pai dinhmun enin a tha thawkhat viau a ni a ti a. State thenkhat chuan thla hlawh neiin mi engemaw zat an chhawr a, MGNREGS Administrative Cost a lo thlen that loh hunah hlawh an la mumal thei lova; hlawh atan sum taktam an hmang ral a, Social Audit tihna tur sum an nei thei ta thinlo a ni tiin a sawi a. Mizoram sawrkar chuan tha taka kalpui a duh a; tunah hian mi 29 ten tha takin Training in zo thei hi a lawmawm tak zet zet a; thalai mi 29 lai mai Part time Job kan han insiam sak thei tur hi a lawmawm tak zet a ni a ti a. Minister chuan training pawimawh leh tha tak buatsaih theihna tura rim taka thawktu SIRDPR Director leh a staff chungah te, Social Audit Unit lama Director leh a staff te, kan Lead Course Coordinator leh NIRDPR lama kan hotute chungah te lawmthu a sawi tak meuh meuh a ni.
He hun hi Pu Lalhmachhuana, Director SAU chuan a kaihruai a. Dr. Irene Zohlimpuii, Director SIRD&PR hnen atangin thusawi tawi ngaihthlak a ni a. Pu Debasis Bera, Lead Course Coordinator leh Dr Digambar Chimankar, Associate Professor, NIRD&PR Hyderabad hnen atangin Report tawi ngaihthlak a ni a. Pu Khawlsiamthanga Khawlhring, Associate Professor SIRD&PR chuan lawmthu sawiin he hun hi a khar a ni.
Social Audit concept hi 1940 bawr vel, depression era lai khan USA ah an lo hmang tangkai tawh a, sorkar leh Private sector company ten mipui hnena an thil sem chu a thlenna hmunah a thleng ngei em tih enfiah nan an lo hmang tangkai tawh a. 1950 bawr khan Europe a Company/Corporate te chuan an hnathawkho leh anmahni dawrtute lungawi leh lungawi loh enfiah nan an hmang thin niin an sawi. Guatemala (1985), Mexico (1991), Nepal (2000) leh Uganda (2000)-ah te hian ram dang atangin tanpuina an pekte hman dik a nih leh nih loh sorkar nena tang dunin Social Audit hi an lo kalpui tawh bawk a ni.
Attachment
- Loading attachment...
