No.3739/2021-2022

Aizawl, the 20th January 2022 : Vawiin khan Land Revenue & Settlement Department chuan an Minister Pu Lalruatkima hovin General Conference Hall-ah kum thar atana inhlantharna leh infuihtharna hun an hmang bakah Minister chuan Land Revenue & Settlement chungchanga mipuite hriattur pawimawh leh awmhmun atanga department dawr dawna thil tul te inhrilhhriatna ‘Awareness Video Clip’ a tlangzarh nghal bawk a ni.

Minister Pu Lalruatkima chuan kum kalta chhung khan hripui leng karah Revenue Department chuan remhre taka ruahmanna an siam avangin hna khaihlak lutuk lovin an kal thei chu a lawmawm takzet a ni, a ti. Revenue Department chuan chhung tin mamawh leh a tel lova awm theih loh, chhungkaw tin file/document kawltu department a nih avangin file vawn that leh document vawnhim chungchangah mawh nasa takin a phur a, hemi kawngah hian a chhunga thawkte chu neitu an ni tih hria a, an mawhphurhna theuha tan la thar leh turin a fuih a. Department rawn dawrtute hi naupang lam aiin upa lam nu leh pa te a tam zawk an nih thin avangin dawhtheihna leh hawih hawmna nena lo dawr zel turin a ngen bawk a.

Pu Lalruatkima chuan LR&S Department hnuaiah dan leh hrai, rules leh act chungchangah hriattur tam tak a awm a, thawktuten chu intuaihriam leh theuh a tan la zelturin a chah bawk a. Technology hmang tangkai thiam apiang an vannei tih hria a, hmasawn tum zel turin a chah bawk a ni.

He huna Awareness Video Clip tlangzarh hi department website, instagram leh twitter-ah te phochhuah a ni dawn a ni.

He hun hi Pu Remlalliana Hnamte, Deputy Director chuan kaihhruaiin, Pi Angela Zothanpuii chuan kalte lawmna a nei a. Pu C. Lalrosanga, Additional Secretary hnen atangin thusawi tawi ngaihthlak a ni a. Pu C.Lalringliana, Joint Director chuan lawmthu sawiin he hun hi a khar a ni.