No.7242/2020-2021

Vawiin khan Land Revenue & Settlement Department (Secretariat) chuan an Minister Pu Lalruatkima hovin SAD Conference Hall, MINECO-ah kum thar atana inhlantharna leh infuitharna hun an hmang.

Pu Lalruatkima chuan kum kalta chhung khan hripui leng mai bakah lirnghing leh ramri  buai avanga ramin nasa taka harsatna kan tawk chung pawhin sawrkarin theihtawp chhuahin hmasawnna hna a kalpui zel a, a bik takin Revenue Department chuan remhre taka ruahmanna an siam avangin hna khaihlak lutuk lovin an kal thei chu a lawmawm takzet a ni, a ti. Revenue Department chuan chhung tin mamawh leh a tel lova awm theih loh, chenna in sakna tura ram ruahman leh enfel hna an thawk a, tihsual palh chuan chhungkhat laina te, veng leh veng, khua leh khua te hial pawh innghirngho theihna a nih avangin taima leh fimkhur taka hna thawh a tul a ni, a ti a. Nitina a za tel teh meuh dawrtu nei, anmahni dawrtute chu kum upa lam te, mi harsa tak tak te an nih fo thin avangin  rilru dam taka an siam a tul a, an thil dil ang tihfel vek theih a nih loh pawhin rilru nuam taka an siam zel a pawimawh thu Revenue Minister Pu Lalruatkima chuan a sawi a ni.

Pu Lalruatkima chuan Revenue hi State sum hmuhna pawimawh ber, ram economy thlenga a chhiat a thata mawhphurhna la tu, ram hmasawnna atana hmanraw pawimawh tak kawltu an ni, a ti a. Ram leh  hnam damna leh hma kan sawn theihna atan theihtawp chhuaha he kumtharah hian hna thawk turin Revenue Secretariat-a thawktute a chah a. Pathian leh ram tana thawk an ni tih vawng reng tur leh Pathian malsawmna dawng tlaka nung turin a fuih a ni.

Land Revenue and Settlement Department chuan kum kalta chhung khan land lease 92, house pass 310, periodic patta 13, mutation (land pass tihdanglam) 106, LSC transfer/ house site approve 3 leh land compensation award approve 3 an nei a ni. Land acquisition chungchangah hian National Highway zauh tur hna kal lai mek 6 bakah hmasawnna ruhrel dinna tur tihfel ngai engemawzat an nei a, national highway bikah hmachhawp pahnih NH-502A Khawzawl-S.Bungtlang-Hmawngbu-Zocha River leh NH-102B Saitual-Ngopa-Tuivai River an la nei bawk a ni. Revenue hian court case thar dawn belh leh inchiah mek 1154 an nei a. April - November 2020 chhung khan non tax revenue cheng nuai 99.52 leh revenue tax cheng nuai 995.79, belhkhawmin cheng nuai 1095.31 an hmu a. Registration fee leh stamp duty ah November 2020 thleng khan cheng nuai 394.75 an hmu bawk.

Inhlantharna programme hi LR&S Secretary Pu R.Zarzosanga’n a kaihruai a. Joint Secretary Pu C.Lalrosanga’n Revenue Secretariat hnathawh dan, hmalak mekna leh hmachhawp te a sawi a ni.