No.7117/2020-2021 

Vawiin khan Rural Development Department chuan an Department Conference Hall, Aizawlah RD Minister Pu Lalruatkima hovin inhlantharna hun an hmang.

Pu Lalruatkima chuan COVID-19 hrileng karah kumthar 2021 dam taka an thleng thei chu lawmawm a tih thu a sawi a. He hripui leng hian harsatna tam tak thlen mahse Mizoram mipui te zingah zonunmawi parchhuakin, thenawm te leh veng te inlainattawnna nen, khawtlangah chhuanchham awm hlauvin induhsakna an lantir a; VLTF leh LLTF ten mahni khawtualah hma an la a; sawrkar, kohhran leh tlawmngai pawl  hrang hrang te thawhhona leh mipui te thuawihna avangin India ram state te zingah COVID-19 vei (active case) nei tlem ber te zing ami kan ni, a ti.

RD Minister chuan lockdown hunlai atanga vawiin thlenga Mizoramah chhuanchham an awm loh na chhan pawimawh tak pakhat chu RD hmalakna a ni, a ti a. Rural Development Department chu thingtlang mite tihhmasawnna tura thawktu, eizawnna kawnga khai chhuak a, kawng dik kawhhmuhtu an ni tiin thawktu te chu an mawhphurhna len zia hriaa, thlen chin atanga hmasawn turin a fuih a ni. Thingtlang mite tana hmalakna pawimawh ni 100 inhlawh tluang takin an kalpui thei tih Minister chuan a sawi a, PMKSY ah state dang te dawn ve loh cheng vaibelchhe 17 chuang zet an hmuh thu te, Ministry of Home Affairs atangin BADP ah additional funding an hmuh thu leh DRDA a thawktu mi 92 absorption chungchangah chak taka hmalak mek a nih thu Pu Lalruatkima chuan a sawi a. Kawng hrang hranga hlawhtlinna an hmuh chhoh mek chu thawktu te thawhrimna leh thawhhona vang a ni, a ti.

Programme hi RD Director Pi Florence Zotluangpuii’n a kaihruai a. Joint Director Pu K.Lalhmuakliana’n lawmthu sawiin hun hnung a khar a ni.

Attachment

  • Loading attachment...