Rural Development Minister Pu Lalruatkima chuan tukin khan a Bial Aizawl West II huamchhunga, Smart city hnuaia hnathawh tur hrang hrang te a en.

Minister Pu Lalruatkima hian Ebenezer Hospital bula Smart Parking siamna tur ruahmanna kalpui mek te, AMRUT hnuaia Multi Level Car Parking and  Multipurpose Complex YMA rama sak tur te, Tuikual Field Futsal khelhna tur a dung lam metre 48 leh a vang metre 37 a zaua siam mek te, Tuikual North Indoor Stadium chei that ngai leh kum 1998 a sak tawh Vaivakawn Bazar sak dan tur te a hmunah kalin a en bawk a ni.

Minister chuan hmasawnna ruhrel hrang hrang te chu khawtlang mipui tana tangkai thei ang ber leh huam zau thei ang ber tura tih anih thu sawiin Multi Level Car parking leh Indoor Stadium chei that turte chu mahni a in enkawl zui theih dan tur thlenga ngaihtuahna sen tul atih thu a sawi a. Smart City hnuaia hmasawnna hnathawh turah Aizawl West II huamchhunga khawtlang hruaitute chu sorkar hmalakna  thlawpa thawhpui turin a sawm bawk a ni.

Minister Pu Lalruatkima hi Aizawl Smart City Limited (ASCL) Deputy Chief Executive Officer Pu RL Zidinga, EE Pu K.Vanlalremruata, SDO Pu Lalrambeiseia, AE (Civil) Pu Lalremruata, WAPCOS hotupa Dhirendra Ahire, te bakah AMC Ward 12 Bialtu Councillor Pu R.Thanglura leh khawtlang hruaitu ten an tawiawm a ni.