Vawiin khan Sub-Headquaters YMA Champhai buatsaihin Sub-Hqtrs YMA Office, Tlangrawt, Champhaiah thuthmun Branch hruaitu  thlan tharte pualin inhlantharna hun neih a ni a. He hun hi Pu Lalruatkima, RD, I&PR leh Land and Revenue Settlement Department changtu Minister chuan khualllian niin a hmanpui a ni.

Khuallian Pu Lalruatkima chuan YMA hruaitu kalkhawmte chu chibai bukin   inhlantharna hun hmanpui tura sawm ani chu lawmawm a tih thu a sawi a. YMA ah a mikhual loh thu  sawiin Champhai chu YMA anga bul a lo tanna hmun anih avanga a ngainat thu a sawi a. Kumin atana hruaitu thar duhawm tak tak thlanchhuahte chu   YMA thiltumte hre renga engkima hmahruaitu nih tum turin a fuih a. YMA chu  tlawmngai pawl tanpui ngaite tanpui thin a ni a, Zawlbuka tlawmngaihna leh zo nun ze mawi zirtir thin chhawmnung zel thintu chu YMA hi a ni, a ti a.

I&PR Minister chuan chhiatni thatniah YMA in hma a hruaia, YMA chu  hmeithai leh chhumchhiate thlenga tuamhlawmtu  a ni fo thin ani tiin,   YMA in hotu a nei lo a, hruaitu erawh neiin kawng engkimah hma an hruai  thin a ni,  a ti a.  Pawl anga thawhhonaah  reng reng  mahni duhdan mai niloin midangte ngaihdan thlir thiama inpaizawna thawhho angaih thin thu a sawi a. YMA Member-te chu  tanpui ngaite tanpui thei tura inralrin renga  zawldawh leh tumah hnuaichhiah lova rawngbawl thin turin a chah a. YMA chu hnam darthlalang, hnam nun kengtu leh tualzal nun tarlangtu ani a, khawtlang nun khalh ngiltu leh hnam humhimtu, hmasawnna kawnga sulsutu pawh ani tel bawk a ni, a ti a.   

Minister chuan YMA chu mahni nawmsakna leh hlimhlawp thil duh vanga thil khawn leh dil mai pawl ni loin midangte tana luanchhuahna tura ti thin an nih thu a sawi a. Branch tinin YMA hruaitu hlun leh hlui fel tak takte an neih fur avangin heng mite hian YMA humsual dai tur vengin thurawn tha tak tak an pe thin a, hruitu tharte  chu an finchhuahna ngaichang fo thin turin a chah a. YMA Member-te pawh YMA  anga thiltih nikhuaahte theih ang tawka tela, ram leh hnam khaipa nin tum zel turin a chah nghal a ni.

Vawiin inhlantharna hun hi Pu VL Chama Hnamte, President, SYMA Champhai chuan  a kaihruai a. Pu PC Lalrawnliana, Secretary, SYMA Champhaiin inhmelhriattirna neiin report a pe a. Rev. Jonathan Pachuau-in hunserh hmangin fuihna thu a sawi a. Pu C.Lalawmpuia, SYMA Champhai President hmasa ber pawhin fuihna thu a sawi bawk a ni.

Attachment

  • Loading attachment...