Vawiin chawhnu khan Champhai North Bialtu MLA Dr ZR Thiamasanga chuan BADP sum hmanga sak Sub-Hqtrs YMA Champhai Office cum Library Building, Tlangrawt, Champhai a mi chu a hawng. Hawnna hunah hian bialtu MLA hi I&PR Minister Pu Lalruatkima, Lengteng bialtu MLA Pu L.Thangmawia,  East Tuipui bialtu MLA Pu Ramthanmawia ten  an tawiawm a ni.

Dr ZR Thiamsanga chuan SYMA Office cum Library thar hawn ani chu lawmawm a tih thu leh mipui tam zawkin an hlawkpui ngei a beisei thu a sawi a.  Ram leh hnam chawikanga hmasawn  tur chuan NGO te nena tanho angaih thu a sawi a. Library pawimawhna sawiin, hnam fing leh changkang apiangin Lehkhabu chhiar an peiha Library an ngaihlu thiam em em thin a ni, a ti a. Library tam takte   luah lum loh ani chu pawi a tih thu sawiin,  Champhai District chu zirna lamah tan thar angai a,   chumi tura pawimawh tak chu Library tha neih hi a ni , a ti a. Champhai leh a chhehvel  khawpui thianghlim, hrisel leh mawi zawka siam a suangtuah fo thin thu sawiin chumi tura thawhho puiah mipui te a sawm nghal bawk a ni. Khuallian chuan Lehkhabu leina tur Rs 10000 leh Lehkhabu thar  a hlan nghal a ni.

I&PR Minister Pu Lalruatkima pawhin thu sawiin mipui  siam sawrkar chu amah maiin a kal theilo a, aneitu vek kan ni a, a ti a. Zu leh ruihhlo do kawngah Sawrkar, khawtlang leh Kohhrante   tanho angaih thu a sawi a.  RD Minister ni bawk chuan BADP kaltlangin Capacity Building siam kawngah hmalak niin thiamthil zir kawngah tanlak zel a ni, a ti a.  YMA chu Sawrkar hnathawh chhe lutuk turte vilpui turin a sawm a. Hnathawktute pawh hlep tam lam ringawt ngaihtuah lova hna tha leh tlo siamah inel thin se a duh thu a sawi a. Sawrkar tha, ram nuam leh hmasawn din tura theihtawp chhuah kawnga Sawrkar thlawp tlat turin YMA chu a ngen nghal a ni.

He hunah hian Pu L.Thangmawia Lengteng bialtu MLA pawhin thusawiin lehkhathiam result nghak laiten hun awl tha zawka an hman theih nana ram tana sector hrang hranga an thiamna leh theihna te an hman ve theihna tur kawng dap chhuah angaih thu a sawi a.  YMA in harsatna leh puih an ngaih changin  a theihna zawnah chuan tanpui a inhuam thu a sawi a, Library a dah tur Lehkhabu a hlan nghal bawk a ni.

Thu sawitu dang Pu Ramthanmawia, East Tuipui bialtu MLA chuan  Sawrkar tharin hmabak leh hmachhawp  tam tak anneih thu a sawi a. MLA tha tak ni tur chuan mipuiten bialtu MLA te thilsual ti tura an nawr luih loh angai a, hleibik neilo mipui sawrkar siam kawnga thawhpuiah mipuite a sawm nghal a ni.

He hun hi Pu VL Chama Hnamte, President, SYMA Champhai chuan a kaihruaiin Rev R.Vanlalruata’n hunserh a hmanga. Pu PC Lalrawnliana, Secretary-in report a pe a ni.

SYMA Office-cum-Library hawnna hun neih zawh hnu hian Champhai District chhunga MLA-te leh YMA hruaituten Office tharah hian inkawmhona hun an hmang a ni.