747/2022-2023
Aizawl 2nd June 2022: Vawiin khan Ephraim Higher Secondary School chuan HSLC & HSSLC 2022 Examination-a an zirlai hlawhtling leh tithate lawmpuina leh chawimawina hun Vanapa hall-ah an hmang a; I&PR Minister Pu Lalruatkima chu khuallian niin ‘Felicitation Day 2022’ hi a hmanpui a ni.

Zirlai chawimawina leh HSLC & HSSLC 2022 result tha lawmna Ephraim HSS Vice-Principal Pu Adolf Hitler Sailo kaihhruaiah Khuallian Pu Lalruatkima chuan thusawiin hripui avangin khawvelin harsatna nasa tak a tawk mek a, beisei leh duhdan ang pawhin thil a kal thei meuh lo chung pawhin Sawrkarin theihtawp a chhuah a, HSLC leh HSSLC, 2022 exam-te a buatsaih thei hram a, result pawh tihchhuah niin hetiang hun lawmawm leh tha hman a ni thei hi a lawmawm takzet a ni a ti. Ephraim Higher Secondary School Principal leh a thawhpuite result tha hmu tlaka an inpekna chu fakin naupang tha leh result tha nei tur chuan School dinhmun leh zirna an pek thin hian a zir ve a ngai a ni a ti. A bik takin HSSLC passed tharte - khawvel changkang takah an rawn dakchhuak tan tak tak tawh dawn a, theihtawp chhuaha taimakna, insumtheihna leh tumruhna nei chungin an hmalam atan bei zel turin a fuih a. Marksheet a mark tha ringawt hi an hlawhtling vek kher lo a, a tumruh leh taima apiang tan chauh he khawvelah hlawhtlinna a awm a ni a ti. Pathian leh kan ram tan tiin zirlaite chu hnam dinchhuahna atana hma rawn latu tur leh ram nghahfak an ni tih hre reng turin leh ‘Nu leh pate thuawih hi zir ula, aia upate zah thiam ula, in nu leh paten sum tam tak sengin hlawhtlinna in hmuh theihna atan theihtawp an chhuah a ni tih hre reng ula, Sap tawng takin - You are the Investment of your Parents - tih hi in rilruah dah reng ang che u’ tiin Minister chuan zirlai kal khawm zawng zawngte fuihin an kal zelna turah duhsakna sang ber a hlan a ni.

Ephraim Higher Secondary School hi kum 2018-a din tan a ni a, kumin hi HSLC leh HSSLC Exam an hmachhawn tum 4-na a ni. He School atangin kuminah HSLC exam zirlai 124 awm zingah 122 an hlawhtling a; HSSLC exam zirlai 63 an neih zingah 60 an hlawhtling bawk a ni. HSLC 2022 ah Distinction (with Letter) hmu zirlai 22 awmin First Division (with Letter) 36 an nei a ni. HSSLC 2022 ah Distinction (with letter) 5 leh First Division (with Letter) 8 an awm bawk a ni. Heng zirlai naupang titha zualte hnenah vawiin khan Khuallian-in chawimawina ‘Citiation’ a hlan nghal a ni.

Attachment

  • Loading attachment...