748/2022-2023
Lunglei 2nd June 2022: Vawiin atangin Government Fish Seed Farm, Zobawk atanga tharchhuah Sangha chi a mamawhtute hnenah hralh tan a ni.

Lunglei High Power Committee (HPC), Vice Chairman Pu Lawmawma Tochhawng hmalakna in Lunglei District chhunga Sangha chi mamawhna sang zelah Fisheries Department leh Excell Consultancy Firm te tang dun chuan Sangha chi siam hna hi an thawk dun a ni. A thawhkhatna atan Induced Breeding (Chiu rai) hmang a Common Carp (Sangha sen) chi te chu siam tan niin, April 30, 2022 ah Sangha pui te chu damdawi hmanga Chiu (Injection) tan an ni. Tun tum hmalakna ah hian sangha chi nuai khat vel thar chhuak anga chhut a ni.

Pi Christina Lalramchhani, District Fisheries Development Officer (DFDO), Lunglei chuan HPC, Lunglei Vice Chairman Pu Lawmawma Tochhawng thahnemngaihna leh hmalak puina avanga Department Farm atanga Sangha chi siam mipui a mamawh tute hnen a hralh chhuah theih a ni ta chu lawmawm a tih thu a sawi bakah Lunglei District chhung a sangha vulh tuten an tangkaipui ngei a beisei thu a sawi bawk a ni.

DFDO, Lunglei chuan tun a Sangha (Common Carp) chi Government Fish Seed Farm, Zobawk atanga an siam chu a thawhkhatna chauh ala nih thu leh Fisheries Department te hian Sangha chi dang (Indian Major Carp) te pawh a chi siam leh tumin an inbuatsaih mek thu a sawi bawk a ni.

Vawiin a Sangha chi hralh chhuah hma hun hmanna hi Pu George Lalnuntluanga, FEO, Lunglei chuan kaihruaiin, he hun hmanpuitu Pi C.Lalremruati, MIS, DIPRO Lunglei leh Pu Laltlanthanga, President MJA, Lunglei te chuan thu an sawi bakah Pu Vanlalngaia, FEO i/c Govt. Fish Seed Farm, Zobawk chuan Sangha chi an siamdan chanchin a sawi bawk a ni.

Fisheries Department hnuaia sangha chi siam chhuahna hmun Fish Seed Farm, Zobawk hi kum 1981 ah bultan niin a chhungah sangha dil 13 a awm a. He Fish Seed Farm ah hian nikum khan sangha tih keuna ‘Chinese Circular Hatchery’ chu nikum 2021 khan cheng nuai 4.50 senga siam that niin he hatchery ah hian sangha hrang hrang chi siam chhuah (Breeding operation) hna kalpui chhoh mek zel a ni a. HPC Lunglei kaltlangin helai hmun tih changtlun hna - fencing leh sangha dil tih zau kawngah pawh hmalakna alo kalpui tawh a ni a. HPC Lunglei kaltlang vekin Phairuangkai khaw dai ah sangha dil lian tham tak chei that anih bakah Zawlpui khua ah Public Private Partnership (PPP) Model-in sangha dil ruahman an ni.