749/2022-2023
Champhai, the 2nd June, 2022: Environment Forest & Climate Change (EF&CC) Minister Pu T.J. Lalnuntluanga chuan vawiin chawhma dar 11:30 khan Botanical Garden, Champhai Zotlang dinna tur lungphum, Zotlang hmunhluiah a phum.

Pu T.J. Lalnuntluanga chuan Champhai Master Plan kentel Ecotourism Park, Cultural Centre, Circular Road, Infiamna hmunhma, Industrial Centre leh ruahmanna dang dang zingah Botanical Garden siam chu ruahman tel a nih thu sawiin, Champhai khawtlang leh Mizoram tana chhenfakawm tak tur a puitlin theih nan hmalak chhoh mek zel a nih thu a sawi a. State leh central fund atangin theihtawp chhuaha bultan a nih thu tarlangin, Botanical Garden chu hun reilote chhunga peih fel mai tur chi nilo, a puitlin theih nana hun duh tur a nih avangin mipui lama inzirtirna pek hmasak hmanga bultan chhoh tul a ni, a ti a. Mipuite chu neitu nihna thinlung pua ngaihtuahna seng turin a chah a. Sawrkar Official, khawtlang hruaitu, NGO hrang hrang, pangpar khawitu, khuanu thilsiam venghimtute thlenga kalkawma hun hman a ni chu ropui tiin, Mizorama Botanical Garden kalpui hlawhtling hmasa ber leh tangkai taka chhawr theih tur siam a nih theih nan kan zavaia tantlan tlat a ngai dawn a ni, a ti bawk.

Forest Minister chuan Forest Department hnuaia project-ahte mipui tel vena ngaihpawimawh niin, Green India Mission (GIM) kalpuiah mipuiten neitu thinlung an puta an tel ve zel theih nan hmalak thin a ni, a ti a. Kan chhehvel ram ngaw leh nungchate humhalha venhim kawngah mipuiten neitu thinlung an pu thin chu lawmawm a tih thu tarlangin, Botanical Garden siam turah mipuite a tam thei ang ber an tel theih nan ngaihtuahna sen a ni, a ti. Botanical Garden chuan zirlaite leh thiamna sang zawk nei tura zirbingmite tan thiamthil zirna remchang a chhawpchhuah ngei a beisei thu a sawi bawk.

Thingphun belh uar sauh sauh tum a nih thu leh kangmei chhuak nasa avanga tanlak ngaihna hriain Mualzen ramah project lian tak siamin Nursery changtlung tak kalpui chhoh mek zel a ni, a ti a. Champhai Master Plan hnuaiah khawpui thangzel leh mipui pung zel hmathlira nei chungin ruahmanna duan a ni a, tun atanga reiloteah plan peihfel tlangzarh tum a ni a, project hnuaiah Japan International Cooperation Agency (JICA) leh Rail India Technical and Economic Service (RITES) Limited-te thawhpui an nih theih nan indawra inbiakpawh reng a nih thu a sawi bawk.

Champhai District Bawrhsap Pu James Lalrinchhana pawhin thu sawiin, District hmasawn nana mellung thar pawimawh tak kai a ni ta chu ni chhinchhiah tlak tak a ni, a ti a. Champhai District-in hmabak eng tak a neih thu sawiin, kan zavaia thawhhona leh thahnemngaihna kaltlangin District nuam leh hmasawn tak kan siam thei a ni, a ti. Leilung mawina leh hausakna hrang hrangte duat taka enkawl, vawnhim leh tihpun a tul thu pawh sawiin, Pathianin min pek ramhmul damdawite tihpuna vawnhimna hmunte pawh siam tura ngaihtuahna sen tel a tul thu a sawi a. Botanical Garden Champhaia siam a nih theih nana Forest Minister hmalakna fakawm tiin, a taka a hlawkna chhawr tangkaitu tur mipuiten neitu nihna thinlung pu se a duh thu leh beiseina sang tak a neih thu a sawi bawk.

Thusawitu dang Pu Lalduhthlana, DFO Champhai chuan Champhai Zotlang hmunhluia Botanical Garden siam tur chu Mizorama hmalak mekna awm chhun a nih thu sawiin, Botanical Garden-ah tualto thing leh mau bakah State dang amite a tam thei ang ber dah tum a ni, a ti a. Hmalakna hmasa hnuaiah cheng nuai 40 dawn atangin a luhna gate, a hungna, khawthlirna in chhawng leh inthiarnate siam tawh a nih thu leh, fund lokal leh tur atangin Interpretation Centre leh Nature Learning Centre pawh siam tum a nih thu a sawi a. Lenkhawthawnna tur phul hmun, nauban tihpun leh vawnthatna orchidarium, nauban hmun orchid park bakah thing leh mau hrang hrangte phun tum a ni a, zirlai leh zirbingmite tana inzirna tur hmun chhenfakawm tak siam tum a ni, a ti bawk.

DFO Champhai chuan sawi chhunzawmin, kum 4 chhunga ram ngaw chereu Mizoram chhunga zirchianna atanga a landanin ram ngaw chereu za zela 64 chu Undivided Champhai District-a thleng a nih thu leh siam tha leh tura tanlak ngai ber District a nih thu a tarlang a. Botanical Garden chu ram ngaw chereu ven leh ram ngaw hausakna venthat nana inzirtirna tangkai tak siamtu ni thei tura duan a ni, a ti a. Forest Minister hmalaknain thing tiak lian leh nung tha tur phun tawh turin kum 2019 atangin hmalak a ni a, kumin atangin thing tiak lian tawh sa te phun tan a ni, a ti a. Mimal, pawl leh department-te thingtiak tam zawk phuna enkawl chhunzawm turin a sawm a. Kumin May ni 19 atangin tun thlengin thing tiak sem chhuah chhunzawm zel a nih thu sawiin, thing tiak phun duh tan lak tur thahnem tak a la awm avangin enkawl theih tawk laa phun chur chur turin mipuite a sawm nghal a ni.

He hun hi Zotlang VCP Pu Lalbiakchhunga'n a kaihruai a. Upa L.Rochhunga Ralte, Zotlangin hunserh a hmang a. Pu F. Lalnunhlima, RO Champhaiin thingphun dan tur a sawifiah a. Pu Lalthlamuana, Head Assistant, DFO Office-in lawmthu sawiin hun a khar a ni. Lungphum pual inkhawm tawi zawh hnu hian Forest Minister, District Bawrhsap, SP, Official dangte, NGO leh khawtlang hruaituten thingphun hnatlang an nei chhunzawm nghal a ni.

Vawiin vek khan Forest Minister Pu T.J. Lalnuntluanga, Champhai South bialtu MLA ni bawk chuan a bial chhunga zirna in 3; Presbyterian English Medium School Zotlang, Govt. Comprehensive Middle School Zotlang leh DIET Champhaite a tlawh a. An chanchin leh dinhmunte, mamawh leh harsatna neihte ngaihthlak sakin a tul ang zela hmalaksak a tum thu a hrilh a ni.

Thawktute a kawmnaah tunlai mil zela insiamrema zirtirna kalpui thiam turin a fuih a. A bial chhung zirna in ten result tha tak an nei chu chhuanawm tiin, Zirtirtute chu thahnemngai taka hmangaihna leh rawngbawlna thinlung pu chunga zirtir hna thawk zel turin a chah a ni.