750/2022-2023
Aizawl, the 2nd June 2022 : Hmani lawka khawpui leh khaw fai inelna UD&PA Department buatsaih Mizoram Cleanliness Competition 2021 neiha District Headquarters fai ber lawmman, khaw fai lawmman dangte an lak leh tunhnaia Kayakalp Award sema CHC tha ber lawmman an dawn te chu Saitual District in vawiin khan Saitual College Auditorium ah an hmang a. He hun hi Power Department enkawltu Minister Pu R Lalzirliana, bialtu MLA ni bawk, in a hmanpui a ni.

Minister Pu R Lalzirliana chuan Saitual District in faina kawnga hma an lak that avanga District Headquarters fai ber nihna bakah Ngopa leh Phullen te pawhin khaw fai lawmman an dawn te leh Saitual District Hospital in Kayakalp lawmman semah CHC tha ber nihna an dawn te chu District leh District mipuite tan thil chhinchhiahtlak tak, a District ang zawng pawha inchhuanna tham a nih thu a sawi a. Hei hian Saitual District chu faina, thianghlimna leh hriselna kawngah Mizoram puma meichher kengtu leh entawntlak an nih zia a ti lang chiang hle, a ti a. Heng thilah hian Sawrkar ang chauha hmalak in awmzia thui tak a nei thin lova tiin khawtlang leh mipuite thlawpna leh thawhhona nen erawh vawiin ang dinhmunah kan inhlangkai thei a ni, a ti. Faina leh hriselna kawngah Sawrkar ruahmannate leh hmalaknate theihtawp chhuaha mahni zawn theuha tan la turin khawtlang hruaitute leh mipuite a chah bakah he dinhmun hi nakum lamah pawh an chan leh theih nan theihtawp chhuaha tan la zel turin a fuih bawk a ni.

Faina leh thianghlimna chungchang sawi zau in khaw fai ni turin mipuite an pawimawh dante, mahni pawh fai taka inenkawl leh invawn a tul thu te, in chhung leh a chhehvel fai turin mipa te pawhin hmeichhe tih turah dah mai lovin, an mahni pawhin hmunphiah leh in chhung sekrek khawih hreh loh a pawimawh tih te leh pawn lam faina bakah chhung lam thianghlim neih a tul thu te a sawi tel bawk a ni. Saitual District mipuite chu rilru zau tak nei, hotute a rinna nghat thiam leh entawntlak an nih thu te pawh a sawi lang bawk a ni.

Khawpui fai ber lawmman leh lawmman dangte an dawn hriat reng nana Memorial siam chu Pu R Lalzirliana'n he hunah hian a khuhhawng unveil a. District huam chhunga faina kawnga mipuite zirtirna atana Swaachhta Warrior thlan te hnenah thilpek a hlan bakah Saitual District chanchin leh hmun hma hrang hrangte phochhuahna documentary film DC hmalaknaa siam a tlangzarh bawk a ni.

Programme hi Saitual DC Pu V.L. Hruaizela Khiangte in a kaihruaiin Saitual District in lawmman a dawn te chungchang a sawi a. District Urban Development Officer (DUDO) Pu R.L. Zidinga in District chhunga faina leh thianghlimna kawnga hmalakna hrang hrang te a sawi a. Kayakalp chungchanga hmalakna hrang hrang te chu Pi T. Vanlalliani, Ward Superintendent, Saitual District Hospital hnen atangin ngaihthlak a ni a. Ngopa lama faina kawnga beihpui thlak dan te chu Pu Vanlaltanpuia, SDO(Civil) Ngopa in a sawi bawk a ni. Anni hian faina leh hriselna kawnga District ah Sawrkar, khawtlang leh mipuite thawhhona chu fakawm an tih thu te an tarlang a ni. Pu Ralthuama Ralte, Deputy Director, UD&PA chuan he inelnaa tehfung hrang hrang chungchangte a sawi a. He hunah hian Saitual SP Pu PC Lalduhthlanga bakah Sawrkar official te leh khawtlang hruaitute an tel a ni.

Kum 2017 atang khan khawpui leh khaw fai inelna neih ah Saitual hian lawmman an lo la tawh thin a. 2019 khan Other Towns Category ah 8-na an ni a. 2020 a District anga an telna hmasa berah lawmman pahnihna an la a, nikum inelnaah Mizoram Cleanliness Competition 2021 ah pakhatna dinhmunah an inhlangkai a ni. He inelnaah hian Other Urban Towns Category ah Ngopa chu pahnihna niin Phullen chu pakuana an ni bawk a. Tunhnaia Kayakalp intihsiaknaa Kayakalp (CHC) Category ah Saitual District Hospital chuan lawmman pakhatna la in CHC tha ber nihna an lo dawng bawk a ni.

Zing lamah Minister hian DC Complex Saitual leh Saihmartlang ah te thing tiak a phun a. Cheng vaibelchhe 10 senga sak mek Saitual DC Office thar pawh a tlawh a ni.