1139/2023-2024

14.7.2023 : Vawiin khan Hnahthial RD Block- in kum 60 an tlinna champha, Diamond Jubilee chu Hnahthial RD office complex ah lawmna hun an hmang a. Rural Development Minister Pu Lalruatkima chuan Khuallian niin he hun hi a hmanpui a. Kumin June thla a sak zawh DRDO Office chu a hawng nghal bawk a ni.

Pu Lalruatkima chuan thu sawiin tun hmaa DRDA Office ni thin kha Central sawrkar-in state sawrkar mawhphurna ah a dah tak avangin DRDO ah leh a lo ngai ta a. Covid hripui leh harsatna hrang hrang karah state sawrkarin mahni sum intum chawpa DRDO office kalpui tura ruahmanna siam a ngai ta a ni tih sawiin district hrang hrangah DRDA office hnathawktu awmsa te chu a theih ang anga absorb an ni a. District thar 3 zingah Khawzawl leh Saitual ah te DRDO hawn a nih hnu ah vawiina Hnahthial DRDO hawn theih a lo ni ve leh ta chu lawmawm a tiin thawktute inpekna ah lawmthu a sawi a ni.

Pu Lalruatkima chuan a department enkawl 3 zingah Hnahthial district tana Revenue lam hma la turin Settlement Officer leh Surveyor 1 te dah a nih thu leh an hna pawh an zawm tawh thu a sawi a. ASO leh Surveyor te dah belh turin ruahmanna siam chhoh zel a ni ang, a ti a. Chutih rualin sawrkar thu leh hla puangzar a, DC te tawiawm turin District IPRO pawh kar kalta khan dah a nih thu leh a ni pawhin a hna a zawm tawh tih a tarlang a. Heng atana DC ten hma an lo lakna ah lawmthu a sawi bawk a ni.

Minister chuan RD department chu mipuite rinchhan leh innghahna department a nih angin khawtlang mipui leh pawl hrang hrang te, kohhran te pawhin an pan rawn a ni tiin department hnathawktute chu rawngbawlna thinlung pu turin a fuih a. Jubilee lawm chuan mipuite tana malsawmna thlentu ni zel turin departmentah rah tha chhuah se tih a duh thu a sawi a. RD hmalakna hrang hrang tarlangin Minister chuan Mizoram chu India rama state titha ber pakhat a ni tih a sawi a. Ni 100 inhlawhna ni 100 kalpui state dang an awm lo tih a tarlang bawk.

Pu Lalruatkima chuan Mizote hnenah Pathianin ram thu leh hnam thu a thlung a. Mizo te chu ram hrang hranga an awmna hmun apiangah sakhaw dang an vawn tak thu hriat a ni lo a ti a. Covid hrileng leh harsatna hrang hrang, ram kang, lirnghing leh Assam nena ramria buaina karah sawrkar tan a manganthlak lai ber pawhin Kohhran te sawrkar tana tawngtaiin mipuiin Pathian kan au va, chhanchhuahin kan awm thin a ni, a ti a. Mizoram in harsatna namenlo a tawh laiin Myanmar leh Manipur lama kan unau ten ei tur tlachhama kan awm phal lovin min rawn thlamuan a. Myanmar, Bangladesh leh Manipura kan unau ten harsatna an tawh ve laiin kan ensan thei lo. He ram hi Pathianin malsawmna tam takin in min vur a. Zoram tan hian eng nge kan tih ve theih tih ngaihtuah ila. Mite tan nasa lehzuala malsawmna ni turin tan i la ang u tiin kalkhawmte chu a sawm a ni.

RD Diamond Jubilee lawmna hun ah hian Chairman Pu R.Lalremsanga Hnahthial DC chuan welcome address sawiin kum 2019 August thla a Hnahthial district hawn a nih atanga tun thlenga sawrkar department hrang hrangte inbun tawh dan a tarlang a. District hawn hnu kum 2 chhung chu covid hripui vangin sawrkarin hma a la thei lo tih sawiin kum 2022 July ah District Treasury Office hawn a nih atangin Lunglei Treasury tihbuai ngai tawh lovin District chu a kal chho thei ve tan ta a ni, a ti a . Tunah hian sawrkar deptt hrang hrang DFDO office DVO office, EE PWD office, DRDO office te hawn a ni tawh a. Sericulture leh DCPO office te hawn thuai theih beisei a niin. DCSO office chu hun reilo te ah hawn tura beisei a ni a. DTO leh DLO te pawh hawn thuai theih beisei niin Office awmsa eng emaw zat Dist office ah upgrade a ni bawk tih a sawi.

Hnahthial DRDO office building hi sum 169.68 lakhs hmanga sak niin September 11, 2021 khan hna tan a ni a. June 24, 2023 ah sak zawh a ni a. Tunah hian Project Director tiamin thawktu officer leh staff 17 an awm a ni.

Vawiina Hnahthial RD Block Diamond Jubilee lawmna ah hian Pu R.Lalthazuala Director, RD Deptt leh Pu Lalvenhima Addl D.C & Project Director ni bawk te pawhin thu an sawi a. Pu Lalremruata Sailo BDO Hnahthial in Jubilee lawmna report a pe a. Pi Irene Zohlimpuii Chawngthu Addl. Secretary RD Department in lawmthu sawiin hun hnung a khar a ni.