No.4035/2021-2022

Aizawl, the 18th February, 2022: Vawiin chawhma khan I&PR Conference Hall, Kolasibah Pu Lalruatkima, Minister of State, Land Revenue & Settlement, I&PR, etc. chuan Sub-Registrar Office, Kolasiba hman tan turin, huan, lo, ram neitu inthlakna awlsam leh felfai zawk a ziahfel leh chhinchhiahna tur, Computerization of Registration, National Generic Documentation System a hawng.

Land Revenue & Settlement Minister Pu Lalruatkima chuan tunlai thiamna hmang a lehkha pawimawh hrang hrangte rukruk, kangmei leh chhiatrupna dang thleng thei lak a vawn that a tul thu sawiin hemi kawnga huan, lo, ram kaihhnawih lehkha pawimawh vawn thatna tur ’Computerization of Registration’ hmang thei tur a hawn a ni chu lawmawm a tih thu a sawi. Ramri avanga buaina tam zawk pumpelh nan ramri fel tak a chhinchhiah a, chung lehkha pawimawhte vawn that a pawimawh thu sawiin chumi tur a tunlai thiamna tangkai tak a hmang thei tur a thawktute pawh an intuaihriam zel a tul thu a sawi bawk a ni. Ram neitute chuan ram kaihhnawih a dan dinglaite zir peih a hriatchian a tul thu sawiin dan hriat lohna avanga harsatna tawk an awm thin thu a sawi.

Pu Lalruatkima chuan ram tih hmasawn nan leh intodelh nana duan SEDP kaltlanga ram leilung hausakna hmang a eizawnna ngelnghet siam tum a nih angin hemi atan hian National Generic Documentation System, Computerization of Registration chu hmanraw tangkai tak a nih tur thu a tarlang bawk a ni. 

Vawiin ‘Computerization of Registration’, National Generic Documentation System hawnna hun hi Pi Angela Zothanpuii, Inspector General of Registration & Director, LR&S Department-in a kaihruai a. Dr.H.Lalthlangliana, Deputy Commissioner, Kolasibin kalkhawmte lawmna thu sawiin Pu Remlalliana Hnamte, Deputy Director-in Computerization of Registration chungchang sawi zauna hun a hmang a, Pu Lalmuan Puia, Sub-Registrar & Settlement Officer, Kolasib district-in lawmthu sawina hun a hmang bawk a ni.

Computerization of Registration atan a hman tur software hi Department of Land Resources, Ministry of Rural Development hmalaknain ‘One Nation One Software’ anga kalpui tur a National Informatics Centre, Pune in National Generic Document Registration System (NGDRS) hi a siam a. Cloud based Server-ah Document registration te chu uluk tak a vawn that niin India ram ah he software hmang thei hmasa parukna kan nih thu leh NE state zingah pahnihna kan nih thu tarlan a ni a. He hmalakna hian ram chhinchhiah fel mai bakah Registration Fee leh Stamp duty thlengin kan tangkaipui tur thu tarlan a ni bawk.