3039/2022-2023

Kolasib dated 13th December 2022: Zanin khan Pu Lalruatkima, Minister, Rural Development Department chuan khuallian niin YMA Hall, Hmarveng, Kawnpui a hawng a Pu K.Laldawngliana, MLA, Tuirial ST Assembly Constituency chu khual zahawm a ni.

Khuallian Pu Lalruatkima, Minister, Rural Development Department chuan  khawtlang tihhmasawn nana ruahmanna ruhrel chu tihpuitlin harsa khawp a hmachhawp insiam a pawi thu sawiin mahni mamawh tawk leh tangkaipui dan tur ang a hmathlir neih thiam a pawimawh thu a sawi a, chumi kawng a Hmarveng YMA hall sak puitlinna tur a YMA hruaitute leh khawtlang thawhhona chu entawntlak a tih thu a sawi. Minister chuan YMA chu thlei bik nei lo, mi zawng zawng lenna pawl a nih angin YMA Hall thar chu khawtlang tan a hmun tangkai tak ni turin duhsakna a hlan a. Hnam hmangaihna rilru tihpun nan te, tlawmngaihna leh zo nun ze mawi hrang hrang chawinunna hmun a hmang turin Minister chuan kalkhawmte chahin hnam hla leh ziarang inzirtirna kawng a hmanraw tangkai a hmang turin a chah bawk a ni. Khawvel changkanna ina a ken tel thil hrang hrang awm te chu hman tangkai thiam a pawimawh thu sawiin hmasawnna kawng zawh tur a pawimawh hmasa chu hriselna a nih thu a sawi a. Chumi tur chuan faina leh thianghlimna ngaih pawimawh a tul thu leh taksa insawizawi leh mahni inthununna intihhmuh nan infiamna uar a pawimawh thu a sawi. Minister chuan hmasawnna kawng a thil tul tak chu inkalpawhna tha neih a nih thu tarlangin hun rei lote ah Kawnpui chu 4 lane in a paltlang thuai tur thu a sawi a, tun a kawng kan neih sa enkawl hna pawh tha zawk leh chak zawk a kalpui a nih theih nan a enkawltu, NHIDCL hotute a hriattir nghal thu a sawi bawk a ni.

Khual zahawm Pu K.Laldawngliana, MLA, Tuirial Assembly Constituency chuan YMA member-te chu mi tlawmngai, tanpui ngaite thlamuantu leh mahni inthunun thei mi an nih thu sawiin thangtharte leh thalai zawkte ram leh hnam hma hun thui tak innghahna an nih angin YMA Hall chu nun kawng dik inzirtirna hmun a hmang thin turin a fuih a. Kawnpui khua chu ram leh hnam tan a mi hlawtling thahnem tak an lo chhuah tawhna a nih angin ram tan a mi tangkai leh hnam tihmingthatu thahnem zawk chherchhuak zel tur a tan la turin a fuih bawk a ni.

YMA Hall, Hmarveng, Kawnpui hawnna hun hi Pu H.Lalmuanpui, President, Hmarveng Branch YMA in kaihruaiin Pu Golden Jubilee-a, Finance Secretary in kalkhawmte lawmna thu a sawi a. Pu K.Lalhmachhuana, VCP, Kawnpui-I in YMA Hall sak dan report a pe a, khawtlang hruaitu aiawh atang a thusawi ngaihthlak niin Pu Zarzoliana, Vice president chuan lawmthu sawina hun a hmang bawk a ni.

Report a tarlan danin zanin a Hmarveng YMA Hall hawn tak sak bultanna hi NEDP sum cheng nuai 5 hmangin kum 2018 khan kalpui a ni a. Kum 2020 khan Rural Development department kaltlanga cheng nuai 8 hmang a sak chhunzawm niin DRDA office kaltlanga kum 2021 a cheng nuai 2 leh kum 2022 a cheng nuai 5 hmangtein sak zawh a ni a. Hnatlang kaltlangin tha 311 seng ang a chhinchhiah a ni.


Attachment

  • Loading attachment...