3040/2022-2023

Champhai, the 14th December, 2022: Khawzawl District Bawrhsap Pu C.C. Lalchhuangkima chuan vawiin chawhma dar 10 khan Research & Development Cell, Internal Quality Assurance Cell (IQAC), Govt. Khawzawl College buatsaih Chawngtlai khaw chanchin ziahna 'NGENMU' tia vuah lehkhabu a tlangzarh.

Lehkhabu tlangzarhtu District Bawrhsap Pu C.C. Lalchhuangkima chuan Govt. Khawzawl College kutchhuak lehkhabu palina tur Chawngtlai khaw chanchin ziahna lehkhabu tha tak 'Ngenmu' tlangzarh a ni ta chu lawmawm tiin, lehkhabu puitlin nana tha thawhtute chhuanawm a tih thu a sawi a. Lehkhabu ziah leh puitlin chu thil awlai anih loh thu sawiin, thil harsa tak, mahnia khawhar taka ngaihtuahna sen ngai leh zirbingna nena tangkawpa nasa taka beih ngai thil a ni, a ti a. Tunlai thangthar lehkha thiam zawkte'n zirbingna hmanga history an ngaihven thar lehzual a tul thu sawiin, kan hnam ziarang leh pipu sulhnute kan ngaihsak a pawimawh hle a ni, a ti bawk.

Pu C.C. Lalchhuangkima chuan hnam ziarang leh thil hluite thailanna lehkhabu ziaka dah that a ni chu hlu a tih thu leh research ti zel tur bakah zirlaite tan a tangkai dawn thu pawh tarlangin, Mizo te'n kan chanchin ziaka dah that kan ngah tawk lo hle a, hemi kawnga tanlakna Chawngtlai khaw chanchin mumal taka ziak leh dah that a ni hi a entawntlak hle a ni, a ti bawk a. Chawngtlai chu Mizo Historical Village anih thu leh thil tam tak hmuh leh zir tur a awm thu sawiin, lehkhabu tlangzarh tak chuan zirlaite leh zirbing mite tangkai taka a puih ngei a beisei thu a sawi bawk.

Lehkhabu tlangzarhna hun College Multipurpose Hall-a hman hi Pi H. Lalthanpuii, Coordinator oordinator, IQAC chuan kaihruaiin Pu K. Ziona, Principal, Govt. Khawzawl College-in kalkhawmte lawmna thu a sawi a. Chawngtlai VCP Pu H.Lalremsanga hnen atanga thusawi ngaihthlak anih hnuah Pi Lalruatmawii, HOD, Department of Education-in lehkhabu thlirlawkna leh sawizauna hun a hmang a. Dr. Lalliantluanga Ralte, Asst. Coordinator, IQAC in lawmthu sawiin hun a khar a ni.