Tukin zing khan Finance Minister, Aizawl East-II bialtu MLA ni bawk Pu Lalsawta chuan a bial chhung hmun 3 a hnathawh mekna chu a hmunah kal in a enfiah.

Minister Pu Lalsawta chuan Armed Veng South atanga Bethlehem panna kawng, Armed Veng South atanga Ramthar Thlanmual pawh theihna tur kawng sial mek Phase-1 leh Armed Veng Community Centre sak mek te chu a tlawh a. Kawng siam dan leh Community Centre sak mek chungchang chu a tlangpui tarlan a ni a, Kawng siam avanga Mipuite tan harsatna awm thei te sutkian dan tur bakah Kawngpui chu Mipui leh Motor te tan harsatna awmlo thei ang bera zawh a nih theih dan tur te sawiho a ni a. Hei bakah hian Mipuite ina kawng dim na chang hre tura zau zawka inhrilhhriat a pawimawh thu te pawh sawiho a ni.

Urban Development & Poverty Alleviation (UD&PA) Department hmalakna hnuaia hnathawh te hi Armed Veng South atanga Bethlehem Veng panna kawng siam zawh tawh chu ‘Cement Concrete Flooring’ niin Metre 320 vela thui a ni a, kawng sirah hian tui luanna tur side-drain thatak siam a ni bawk. Armed Veng South atanga Ramthar Thlanmual pawh thei tur kawng Phase-1 Metre 310 vela thui chu laih zawh tep tawh niin, Armed Veng Community Centre sak mek ah hian Basketball Court, Conference hall, Committee Room, Table Tennis khelhna, RCC Structured Rain Water Harvesting facility, Vehicle Parking, Kitchen te awm tura duan a ni a. Hei bakah hian Mizoram pum huap item huaihawt pawh thleng thei tura sak tum a ni.

Bialtu MLA Pu Lalsawta hi UD&PA Department Officials, Armed Veng leh Armed Veng South Local Council Members, YMA, MHIP, MUP leh NGO hrang hrang aiawh ten an tawiawm a. Bial mipuite aiawh a kalkhawm te chuan development a tui tak bialtu MLA an nei chu vanneihthlak an tih thu an sawi a, a hmalakna te chu a taka hmuh tur tamtak a awm avangin fakawm an tih thu an tarlang bawk a ni. Tin Urban Development & Poverty Alleviation (UD&PA) Department chu an hnathawh a an inpekna avangin an chungah lawmthu an sawi bawk a ni.