Vawiin khan Chief Minister Pu Lal Thanhawla chu Hmarchhak NCC hotulu Director General, NCC Directorate, North Eastern Region, Maj. Gen. RGR Tiwari leh a thawhpuite Brig. Chatterjee, Group Commander, Silchar Region leh Wing Commander K. Goel, Ist Mizo Air Squadron NCC te chuan hmuin Mizorama NCC hmalakna leh hemi atan thil tul te an sawipui.

Maj. Gen. RGR Tiwari chuan Mizo NCC cadets te chu state dangte cadet aia an that thu leh sports an thei thu te leh kawng engkima an fakawm thu te Chief Minister hrilhin NCC band party phei chu Delhi tlanga an inlan tumin mipui leh hotu lian ten dangdai tiin an hlut viau thin thu te a hrilh a. NCC sum Mizoram sawrkar atanga an hmuh tur an la hmuh lo avanga harsatna an tawh chungchang a sawi hnuin Chief Minister chuan Finance Department hotute chu tihfel vat turin a hrilh nghal a. Turial Air Field hmuna NCC Academy leh Air Wing Headquarters te dinna atan leh Lunglei a NCC Battalion dinna tur chungchanga Chief Minister zawhna changin Maj. Gen. Tiwari chuan Turiala an hmun hma mamawh tur chungchangah Joint Survey neih a tul thu sawiin hun remchanga Joint Survey hi neih nise a ti a, PWD lam pawh a dawr tawh thu a sawi bawk. Lunglei a NCC Battalion dinna atan lehkha pawimawh te chu Ministry of Defence hnenah thehluh a nih tawh thu sawiin nakum kum laihawl velah din a beisei, a ti. Turial Airfield chu tlem a thuamthat chuan Air Wing hmunpui bakah Flying Club te din a nih thei dawn a ni, a ti bawk.

Chief Minister chuan NCC chungchanga State Advisory Committee chu hun rei tak atanga an thu tawh loh thu hrilhin hun remchanga hmasa berah Committee thu tur hma a lak tur thu NCC hotulu hian Chief Minister a hrilh. NCC hmeichhe cadet Lalrintluangi’n Mt. Everest tlang chhip a thlen hian Mizo cadet te tumruhna a tihlan thu a sawiin hetianga cadet hming chher te hi zirna inah te seat hausak turin Chief Minister hi a ngen bawk a ni.

Mizoram atanga NCC Band Party hi nakum Republic Day Parade zawha Beating of the Retreat parade ah an tel dawn a. He parade hi Prime Minister in an hmanpui thin a ni.

Attachment

  • Loading attachment...