Vawiin khan Chief Minister Pu Lal Thanhawla, Mizoram State Planning Board, Chairman ni bawk kaihhruaina hnuaiah State Planning Board chu Planning & Programme Implementation Department Conference Hall-ah an thukhawm a. Meeting ah hian Finance Minister Pu Lalsawta; Vice Chairman State Planning Board, Pu H. Liansailova; Chief Secretary Pu Lalmalsawma leh Planning Board Member (Official leh Non-Official) leh Expert Member te an tel kim hle a ni. 

Chief Minister Pu Lal Thanhawla chuan Sawrkar Laipuiin Planning Commission a thiah hnuin Budget a awm thin Plan leh Non Plan Head te chu nuaibo in, state zawng zawngte chu Budget thar 2017-2018 ah hengte hi chhunfin a, Budget thar kalpui turin thurawn min rawn pe tawh a, chutiang zawng chuan Budget thar lo awm tur hi kalpui a ngai dawn a, hei hi Sawrkar fawng vuantu leh sawrkar hnathawkten he kalphung thar tur hi kan chian a tul a, chumi anga Budget kan duan a ngai dawn a ti a. Planning Board Member te chu thurawn pe tura sawmin kalphung thar chungchangah an ngaihdan te zau tak sawi turin a sawm a ni. 

Meeting ah hian Finance Commissioner Pi L. Tochhong leh Planning & Programme Implementation Department Secretary Dr. C. Vanlalramsanga ten Budget duanna kawnga kalphung thar Sawrkar Laipuiin an ruahman, Plan leh Non-Plan Expenditure chhunfin a, Budget duan dan tur kalkawng chu sawifiahin kalphung thara thil pawimawh te an tarlang. 

Vawiin meeting ah hian Member ten hemi chungchang hi zau taka sawi hovin Central Sawrkarin state te sum a pek dan a thlak hnuin he thil hi ruahmanna thaa an ngaih thu an sawi a. Hmasawnna hna te chu ‘goal oriented’ leh tunlai khawvel buaipui mek ‘sustainable development goals’ hawi zawnga ruahmanna te kalpui a pawimawh thu te an sawilang bawk a. Budget kalphung thar leh sawrkar programme thar NEDP hi Minister, Parliamentary Secretary leh MLA zawng zawngte bakah Secretary leh Head of Offices-te zirtir leh hrilhhriatna atan hun remchangah Workshop emaw, sawihona emaw buatsaih nise an ti bawk. 

Sawrkar Laipuiin Planning Commission a thiah hnuin Niti Ayog a din a, Plan leh Non Plan sum te hian awmzia a neih tawh loh avangin hengte hi chhunfinin kum thar lo awm tur 2017-18 atangin Budget thar a kalpui dawn a. Expenditure Head awm thin Revenue leh Capital Expenditure te chu la awm chhunzawm turah ruahman niin Capital Expenditure ngaipawimawh turin state te thurawn a pe a. Budget siam rualin kum thum lo awm tura an sum mamawh te tarlangin Medium Term Expenditure Framework te duang turin a ti bawk a ni. Plan leh Non Plan Expenditure chhunfin hi 14^th Finance Commission te, High Level Expert Committee (Rangarajan Committee) te leh Administrative Reforms Commission (14^th Report) te rawt a ni. 

Sawrkar kum thar lo awm tur 2017-18 atan hian Council of Ministers thukhawm chuan Plan leh Non Plan chhunfin chu an lo pawmpui tawh a ni.