Mizoram State Chief Information Commissioner thar Pu Lalduhthlana Ralte, IFS (Rtd) chu vawiin khan Mizoram Governor Lt Gen Nirbhay Sharma, PVSM, UYSM, AVSM, VSM, (Retd) chuan Raj Bhawan Circular Lawn-ah ‘Swearing In’ neihin a la lut.

Mizoram State Chief Information Commissioner thar Pu Lalduhthlana Ralte, IFS (Rtd) hi ni 17 October 1956-ah piangin, kum 1983 khan Indian Foreign Service a zawm a, kum 33 ram palai hna a thawh hnuin Ambassador Grade I-ah kaiin 31 October 2016 khan a pension a. Pu Lalduhthlana Ralte hi ram hrang hrangah leh Ministry of External Affairs hnuaiah te nihna pawimawh tak tak a chelh tawh a, kum 2007-October 2010 chhungin Consul General of India, Hongkong-ah dah a ni a, chumi hnuah November 2013 thleng High Commissioner, Brunei Darussalam-ah a awm leh a, a hna chelh tawp ber chu Manila-ah Ministry of External Affairs aiawhin dah a ni.

Pu Lalduhthlana Ralte hi Utkal University atanga Philosophy (Hons) niin Hongkong Chinese University ah Chinese Mandarin a zir a, Stewart School, Bhubaneswar leh IIT Delhi-ah te pawh a zir bawk a ni. A nupui Pi Lal Thanziki nen fanu 2 neiin tunah hian Mission Veng, Aizawl-ah an cheng mek a ni.