Tukin zing khan Finance Minister, Aizawl East-II bialtu MLA ni bawk Pu Lalsawta chuan a bial chhunga Kawngpui siam mek chu a hmunah kal in a enfiah.

Bialtu MLA Pu Lalsawta hi UD&PA Department Officials te leh Tuithiang Veng Local Council Member ten an tawiawm a. Kawng siam dan tlangpui tarlan a ni a, Kawng siam avanga Mipuite tan harsatna awm thei te sutkian dan tur bakah Kawngpui chu Mipui leh Motor te tan harsatna awmlo thei ang bera zawh a nih theih dan tur te sawiho a ni.

Urban Development & Poverty Alleviation (UD&PA) Department hnuaia Metre 800 (0.8 km) vela thui Kawngpui siam hi Armed Veng South atanga siam tan niin Tuithiang veng paltlangin Bethlehem Vengthlangah a chhuak dawn a ni. He kawng siam nan hian RCC Bridge 2, Slab Culvert 1 leh Retaining Wall hmun hrang hrang ah siam a ni a, Armed Veng South leh Bethlehem Vengthlang inkar inkalpawh nan a tangkai hle tura beisei a ni.