Vawiin chawhnu khan Chief Minister Pu Lal Thanhawla'n Thenzawl Zone Football Association buatsaih MLA Trophy Football Running Trophy 2016 Final leh kharna programme Thenzawl Field ah neih chu hmanpui.

Kharna programme ah thu sawiin Chief Minister Pu Lal Thanhawla chuan thalai te tan khawvel thar buatsaih chu Sawrkar ngaihpawimawh berte zinga ami a ni a, zirna leh infiamna te hi hemi atan hmanraw pawimawh an ni, a ti. Hmarchhak state te zingah Mizoram chu infiamna ruhrel leh a hmun hma te nei tha ber pawl a nih thu tarlangin hei hi Sawrkar hma lakna avangin leh Sports Minister thothang tha leh a ngaihna hria kan neih avangtea kan neih a ni a ti a. MFA hmalakna leh hnathawh avangin thalai tam tak ten Mizoram pawn Club ah te khelin eizawnna nan a an hmang mek hi thil chhuanawm leh lawmawm tak a ni a, hemi avang hian Mizoram chu football factory tih theih khawpin min chawilar a ni, a ti. Infiam mite tan zuk leh hmuam lamah insum leh an fihlim a tul thusawiin sportsmanship spirit hi engtik lai pawha in neih leh in vawn a tul a ni tiin infiammite hi a fuih a. Infiamnaa nat der hi thil tha lo tak a ni a, kan chin loh a tha a, midangte zirtir tur kan ni zawk a ni, a ti.

Vawiina Final match (Senior team category) hi Kawnpui FC, Serchhip leh Dinthar FC, Serchhip ten khel in Dinthar FC, Serchhip te an chak a, Champions Trophy leh lawmman pawisa fai cheng 50,000 an dawng a, Runners Up Kawnpui FC, Serchhip  in Trophy leh lawmman pawisa fai cheng 30,000 an dawng a, hengte hi Chief Minister in hlan a ni.

He Football Tournamant ah hian Under-13,Under 15 leh Senior Category te siam niin senior category ah hian team 13 an tel a, Under 13 ah SSA Football Training Centre chu Champion niin Farm Veng team chu Runners Up an ni a. Under 15 ah Lalpekhlua Memorial FC chu Champion niin Kanan FC te chu Runners Up an ni.