Thalfavang Kut-2016 chu Tourism Minister, Kut Organising Chairman ni bawk Pu John Rotluangliana hovin Tourist Lodge, Chaltlang ah thlirletna neih a ni.

Minister Pu John Rotluangliana chuan Thalfavang Kut chu harsatna liantham engmah awm lova zawh a ni thei chu lawmawm a tih thu sawiin, a hlawhtlinna atan a thawktu hrang hrang, Tourism Department, Sawrkar Department hrang hrang, NGO leh Association hrang hrangte leh thawktute leh chhimtu mipuite chungah lawmthu a sawi a. Kumin Thalfavang Kut chu kum hmasa lam aia hmasawn leh hlawhtling a tih thu leh, buatsaih leh hunah pawh a aia tha zawka kalpui zel a nih theih nan Department hrang hranga thawktute chu a sawm. Heng zingah hian Naupangte leh Mipui tam zawk tel ve theih na tur item chi hrang hrang leh khualzin leh Kut chhimtu mipui te tana Souvenir chi hrang hrang lei tura siam theih ni se tha a tih thu a tarlang a ni.

Tourism Director Pu Vabeiha Hlychho pawhin lawmthu sawina hun hmangin, Tourism Minister Pu John Rotluangliana leh Tourism Secretary Pu V. Lalremthanga te inpekna chu fakawm tiin Thalfavang Kut-2016 hlawhtlin nana Sawrkar Department hrang hrang, NGO hrang hrangte leh tha thawhtu zawng zawngte inpekna leh thawhrimna chu chhinchhiahtlak a tih thu a tarlang bawk. Hei bakah hian Autonomous District Council 3 hotuten Cultural Troupe te kal leh haw na leh ei in na man tur an lo tumsak avangin an chungah lawmthu a sawi a, Kut chhimtu mipuite chungah lawmthu a sawi bawk a ni.

Vawiin Review meeting ah hian Pu V.Lalremthanga, IAS,Secretary, Tourism Department, Sawrkar Department hrang hrang Official te leh NGO hrang hrang te an tel a ni.