Vawiin khan Chief Minister Pu Lal Thanhawla'n Commerce & Industries Department hnuaia NLUP 3rd leh 4th Phase a Thenzawl Cluster a puantah thlangtu beneficiary te hnenah puantah khawl (Shuttle Fly Loom) semna programme Joint YMA Hall, Thenzawl a buatsaih chu khuallian niin a hmanpui a. Chief Minister hi Parliamentary Secretary Pu Joseph Lalhimpuia leh Parliamentary Secretary Pu H. Zothangliana ten an tawiawm a ni.

Chief Minister Pu Lal Thanhawla chuan NLUP chu mirethei leh miharsa te lam hawi leh Pathian lam tang programme anih avanga hmuhsitna leh rinhlelhna karah pawh a hlawhtling chho mek a ni, a ti a. Hun hmasa lamah NLUP dawngtu te chuan rinawmna, dikna, taimakna leh Pathian tihna nung nen an dawn avangin Pathian in mal a sawm a, an hlawhtling a, tuna dawngtu te pawh hian hetiang rilru pua in dawn leh in hlawhtlin tum a pawimawh a ni, a ti. Thenzawl chu hmun laili leh remchang anih avangtein Sawrkar leh Department hrang hrang te duhsakna an hmuh hnem thu sawiin malsawmtlak a awm a pawimawh a, phu renga kan awm chuan malsawmna tam zawk leh kawng tam zawk a in hawn a beiseiawm a ni, a ti.

Hmathlir tha neih a pawimawh thu leh a ngaihna hria nih a tul thu te sawi langin heng nei tha hruaitute kan neih chuan hmasawnna tam zawk kan nei thin a ni, a ti a. Kolkata Salt Lake a Mizoram House leh Lengpui thlawhna tumhmun te chu hmathlir neih that avangin buatsaih a ni a, tunah chuan Mizoram pumin kan tangkaipuiin kan chhawr hle a ni a ti. Ngaihtuahna tha nei si mahse a tak ram chan tir theih loh chu thil vanduaithlak anih thu a sawi bawk.

NLUP dawngtute chu Commerce & Industries in an duhsak zia hria a, tanpui tlak zela awm turin leh tanpuina an dawn chu an chhungkaw dinchhuahna atan NLUP hlawhtlinna atan leh an mahni pawhin hlawhtlin pui ngei turin a chah a. A hlawhtlinna turin a dawngtuten mawhphurna in nei a, khawtlang hruaitute pawhin mawhphurna in nei tel bawk a ni, a ti. Mizo thilsiam a bik takin puantah leh khum beu te hi mimal leh Sawrkar anga mikhual kan neihte duhsakna entir nan kan pe thin a mahse a quality chhe chho mek hi thil ngaihmawhawm tak a ni a, kan thil siamchhuahte hi a quality kan ngaihpawimawh a tul a. Kan thil siam te hi kuttling leh mittling a ni tur a ni a, Ringtu Kristian ang pawhin thil inhmeh tak niin ka hrai a, khitiang turin hma kan lak a pawimawh a ni, a ti. Puantah chungchang sawiin puantah hi hmeichhia te kutah leh an tih tur bikah chauh dah lova, mipate pawhin puantah an zir a, chhungkaw chawm nan a an hman hi kan ngaihtuah tlan a tul hle niin ka hria, a ti bawk.

Sawrkar programme thar NEDP chungchang sawiin NEDP hi NLUP changkang zawka chhunzawmna a ni a, hemi hnuaia hian Link Road te hi a bik takin ngaihpawimawh a ni dawn a, a tam thei ang ber laih kan tum a ni, a ti. Pathian kaihhruainain Mizoram chu awmze nei taka khawvela hriat phochhuak turin Sawrkar in kawng hrang hrang a hma la in theihtawp a chhuah mek thu a sawi.

Chief Minister in vawiina NLUP beneficiary 141 aiawhin mi 9 hnenah puantah khawl order copy a hlan a ni.

Pu Joseph Lalhimpuia chuan Thenzawl chu puantahna hmunpui leh khawpui ni turin Sawrkar in kiltin atangin hma la in a buatsaih mek thu a sawi a. NLUP tan anih atangin Commerce & Industries Department in beneficiary 27,144 a tuam tawh thu leh sum cheng nuai 22,452.53 an hnenah pek a nih tawh thu te a tarlang a. Puantahna kawnga Sawrkar hma lakna hrang hrang a thusawi ah a tarlang bawk. Thusawitu dang Pu H. Zothangliana chuan Serchhip bial an vanneih thu sawiin bial mipuite chu lawm nachang hre turin a chah.

Programme hi Commerce & Industries Department, Director Pu J. Hmingthanmawia'n kaihruaiin Pu Lalhrilliana, Nodal Officer (NLUP) in Technical Report a tarlang a, Joint Director (Handloom & Handicrafts) Pu C. Lalchhandama in lawmthu sawiin hun a titawp.

Vawiina NLUP tanpuina dawngtu hi beneficiary 141 niin puantahna khawl 2 zel (pakhat man cheng 8500) hlan a ni dawn. Puantahna khawl hi Shuttle Fly Loom niin Mizorama puantah te hman lar ber a ni a, Thenzawl tualchhung mite siam a ni.

Puantahna lam Handloom ah hian Sawrkarin nasa takin hma a la mek a. Thenzawl Handloom Complex chhunga Mizoram Handloom Export Faciliation Hub dinna atan Sawrkar Laipui atanga sum dawn (cheng nuai 115) bak, cheng nuai 722 chu NEDP kaltlangin a ruahman fel tawh a. He sum hmang hian Faciliation Hub hna hi zawh thuai tum a ni. Handloom & Handicrafts Investment and Promotion Council pawh tunhnai khan din a ni tawh a. Brand Registration leh Geographical Indication Registration te chu chak tak bawhzui mek a ni a. NERTPS leh NHDP hnuaia te hma lakna a awm mek bawk a ni.