Vawiin khan Social Welfare Minister Pu PC Lalthanliana chuan Lunglei-a National Cadet Corps (NCC) South Mizoram Battalion hmun tur a tlawh. Minister hi Lunglei DC Dr Ankita Chakravarty, IAS bakah PWD, I&PR, Sports and Youth Services leh Printing and Stationery Department hotuten an tawiawm.

Mizoram Chief Minister Pu Lal Thanhawla hmalakna zarah South Mizoram NCC Batallion dinna tur hian sawrkar laipui Ministry of Defence atangin phalna hmuh tawh a ni a. Ministry of Defence hian South Mizoram NCC Batallion enkawl tur hian army officer pahnih, Junior Commissioned Officer (JCO) pariat (8) leh Non-Commissioned Officer (NCO) sawmpariat (18) dah a remti a, hemi bakah hian Civil Employee mi 27 an thawk dawn bawk a ni. South Mizoram NCC Batallion hian Lunglei District bakah District dang pathum - Siaha, Lawngtlai leh Serchhip a enkawl tel dawn a, a zavaiin cadet 3520 zet an awm thei dawn a. South Mizoram NCC Batallion hi Mizoram Government Press Production Centre, Lungleiah din a ni dawn a. Kumin September thla chhunga hawn hman ngei tura hmalak niin building thuamthat hna PWD in ngawrh takin an thawk mek a ni.  

Minister Pu PC Lalthanliana chuan hmalakna leh hmachhawp tlangpui te Lunglei DC leh official dangte sawipuiin hna chak taka a kal theihna turin ruahmanna a siam pui a. South Mizoram NCC Batallion chu thalaite khawvel thar siam sak tu  leh zau zawka thalaite tan hamthatna leh hmasawnna rahbi a hawn ngei a beisei thu a sawi a. NCC chu thalaite tan nun kawng dik zawha mahni invawnna atan leh ram leh hnam hmangaihna kawnga inkaihhruaina tha tak a nih thu a sawi bawk.