Vawiin khan Tlungvel Community Hall-ah MP (Rajya Sabha) Pu Ronald Sapa Tlau hovin program pawimawh tak hman a ni a. Agriculture, PHE leh DRDA te tangkawp inkhawm buatsaihah hian Model Village chungchang, faina chungchang leh organic farming pawimawhna te inzirtir a ni.

Pu Ronald Sapa Tlau chuan hmasawnna hi sum ringawtah a innghat lo a, mihring rilru puthmangah a innghat thui hle, a ti a. Theihtawpa hnathawk, tang lai mek te tanpuina hi tanpuina dik a ni, a ti. Tlungvel khua chu model village a nih ang ngeiin nitin ei leh bar zawnna kawngah leh faina kawngah midangte entawntlak ni turin a chah a. Thil tha kan duh a, thil tha changtu leh neitu kan nih dawn chuan taihmak, tumruh leh tih tak takna a pawimawh, MP chuan a ti. Sansad Adarsh Gram Yojana (SAGY) village an nih anga sawrkar hmalakna tur hmabak la awm te pawh hlenchhuah thuai tum a nih thu a sawi bawk.

Kum 2016 khan Tlungvel hi MP (Rajya Sabha) Pu Ronald Sapa Tlau chuan model village-ah a thlang a. Department hrang hrang ten hma la in, khaw dangte entawn tlak ni thei turin a bik takin faina leh hriselna chungchangah mipui mimir rilru thlakthleng a, changkanna lam an pan theih nana hmalak chu Model Village in a tum ber a nih thu DRDA Project Director Pu V.Lalengmawia chuan a sawi a. Model Village a thlan an nih tirh atangin khaw mamawh zirchian a ni a, heta tanga duan chhuah Village Development Plan hmang hian department hrang hrangin an scheme neihsa atangin hma an la a ni, DRDA Project Director chuan a ti.

Swachh Bharat Mission (Gramin) hnuaiah PHE Sr. EE Er.Lalsanga'n faina chungchang inzirtirna hun a hmang a. Vawiin hian MP hian Tlungvel chhungkaw tin daih tur bawlhhlawh bawm pahnih zel a sem a. Bawlhhlawh bawm pakhat man hi cheng 160 a ni a, 1300 vel sem a ni. Bawlhhlawh bawm sem nana sum sen ral hi cheng 4,48,000 a ni a, Mumbai atanga chah a ni. Bawlhhlawh tawihthei leh tawihtheilo mumal taka thliar hrana a paihna tur bik dumping ground a paih a nih theih nan SBM(G) kaltlang hian Tlungvel khuaah hian chhung tin daih tur a thlawnin bawlhhlawh bawm pahnih zela sem a ni. Bawlhhlawh paihna bawm lian community dustbin litre 100 dawng 45 chu a stand nen khawlai leh hmun pawimawh bikah VC te kaltlanga hun a ni a. Bawlhhlawh tawih thei paihna tur dumping ground hran siamna tur cheng nuai 3.63 sanction atangin first installment cheng nuai 2 chu Tlungvel VC te kutah dah a ni tawh.

Lei hanna chauh hmanga thlai thar inzirtirna hun Agriculture hnuaia Mission Organic Farming Technical Assistant Pu Vanlalnunpuia'n a hmang a. Organic farming nih phung sawifiahin chemical fertilizer hman loh mai piah lamah organic huan chu ram leilung nena inhmeh, tu leh fa te thlenga eizawnna tlak, hmun nghet a ni tur a ni, a ti. Organic thlai hi a hrisel a, a man to deuh mahse hralh a tla a, eizawnna hlawk takah a hman theih, tiin, Mizoram leilung hi chemical in a la ti chhelo a, ruahtui a tam a, tualto thlai (hmarchate, chhawhchhi etc) kan nei tha a, chuvangin Mizo tan chuan organic   farming-a luh hi a awlsam a ni, a ti.

Programme hi Aizawl District Agriculture Officer Pu R. Lalnunzira'n a kaihruai a, Tlungvel VCP Pu H.Lallawma pawhin thu a sawi. Program chhim tur hian Tlungvel mipui 600 chuang an tel a ni.