2253/2024-2025

Aizawl dated 27th September 2024: Vawiin khan IWRD Auditorium, MINECO, Aizawlah Pu PC Vanlalruata, Minister, Irrigation & Water Resources Department chuan Irrigation & Water Resources Department Staff Welfare Association of Mizoram (ISWAM) General Body Meeting vawi 8-na a hmanpui a. Er. Lalrotluanga, Chief Engineer chuan hun kaihruaiin ISWAM member boralte sunna hun leh member thar lawmna hun hman a ni.

Minister Pu PC Vanlalruata chuan thawktute tha lehzual a inthlunzawmna tur a, Irrigation & Water Resources Department Staff Welfare Association hnuai a inkaihhruaina tha tak a awm chu pawl hruaitute fakawm a tih thu a sawi a. Mipui tan a an rawngbawlna kawngah mawhphurhna hrang hrang hlenchhuak turin rinawmna leh inpekna tilangtu ni zel turin a fuih a ni. Staff Welfare Association chu Sawrkar Department hnuai a dinhmun hrang hrang luahtute insuihfinna pawl a nih thu a tarlang a. Thiamna leh theihna inang lo tak tak awm hona pawl a nih angin, in mamawh tawn theuh an nih thu Minister chuan sawiin zahawm leh hawihhawm tak a indawrtawnna chuan inpumkhatna tha a siam thin thu a sawi bawk a ni. Pu PC Vanlalruata chuan thawhhona kawngah hunbi vawn dik te, rinawm tak a mahni kova mawhphurna awm hlenchhuah thin a pawimawh thu te sawiin mi tam tak thawhrimna chu mi tlemte inthlahdahna avangin a hlawhchham phah theih thu a sawi a. Tanrualna leh thawhhona tha siam tur hian Staff Welfare Association hmalakna hi a pawimawh thu a tarlang a. Hnathawhna hmun ah tunlai thiamna hmang tangkai thiam mi nih tum theuh turin ISWAM member kalkawmte a fuih bawk a ni.

Irrigation & Water Resources Department Staff Welfare Association of Mizoram General Body Meeting vawi 8-naah, chawhma hun ah hian Kum 2022-24 inkar a Association hmalakna hrang hrang ngaihthlak a ni a. Member zing a kai sang lawmpuina te, member thar lawm luhna hun leh kum 2022-24 chhung a member 6 boral te sunna hun hman a ni bawk. Tar lan danin IWRD hnuai ah hian Chief Engineer Office, Lunglei Division, Kolasib Division, Champhai Division leh Aizawl Division-a awm a, thawktu hi mi 120 an awm mek a ni.