2252/2024-2025

NEIAIZAWL; the 27^th September, 2024: Vawiin chawhma dar 10:30 khan, I&PR Auditorium, Treasury Square-ah FINER (Federation of Industries in North Eastern Region) te bul tumin ‘International Conference on MSMEs in North East’ buatsaih a ni a. Hon’ble Minister, Commerce & Industries, etc. Pu F.Rodingliana chuan khuallian niin a hmanpui.

Khuallian Pu F.Rodingliana chuan Mizoram sawrkar aiawhin FINER( Federation of Industries in North Eastern Region) leh Ministry of MSME (Micro, Small and Medium Enterprises) official te chungah ‘International Conference on MSMEs In North East’ Aizawla an  nghah avangin lawmthu sawiin,  conference chhimtu  Taiwan atanga local te, Entrepreneurs  te, university leh  college zirlai kalkhawm te hnenah pawh duhsakna hlanin, lawmthu  a sawi bawk. Conference hawnna thuchah sawiin, Minister chuan Mizoram chu Agro-based leh Horticulture based industries tan theihna (Potential) nasa tak neih ni mahse, haichhuah loh a la ni a. Chuvangin tun sawrkar kal lai mek  chuan chutiang  haichhuah nan leh mi taima te dinchhuah veh nan “Bana kaih” (Hand holding) policy a duangchhuak ta a ni. MSME te tan sawrkar hi anmahni puih turin a ding reng dawn a, tunah pawh hian sumchang thlai (cash crop); Aieng, Sawhthing leh Hmarcha chingtu te tan ruahhmanna felfai tak siam niin, anmahni dawmkanna tur sum pawh budget dah a ni. Mizoram chu tlangram a ni a, inkalpawhna kawngpui te a tha tawk lova, kum khatah ni 100 chuang te ruah a sur bawk nen, industry din leh project han kalpui nan sum sen pawh  sang deuhvin, MSME Policy leh Guidelines  pawh state dang leh hmun danga an hman ang te hi hman ve diak diak thei loh chin a awm  mahse Mizoram chu India rama state ralmuang ber a ni a, lehkhathiam tamna leh sakhua khat leh culture khat vuan kan nihna hian thiltih a ti awlsam a. Mizoram Sawrkar  lah  MSME te tan a inhawng zau em em a, anmahni tanpuina tur leh dawmkanna tur policy tha tak tak a nei bawk a ni, tiin India ram state dang leh India ram pawn lama MSME te chu Mizorama lo kal a, industry lo din a, tualchhung mi MSME te leh sawrkar nena thawkho turin a sawm hlawm a ni.

Pi Maria CT Zuali, IAS, Director, Commerce & Industries pawhin thu sawina hun neiin,  Mizoram chu MSME te tan  Agri-based industries, Horticulture-based industry, bamboo based industries, handloom & handicraft industries, Eco- tourism, adventure tourism leh cultural tourism din nan leh kalpui nana  hmun remchang leh rem tak a nihzia thiam taka sawiin, MSME te tana Mizoram a thlanawmna chhan chu a sik leh sa leh a ram leilung  a that bakah, natural resources-ah a huasa a, a ralmuangin a mi cheng te an taimak hle bawk a ni, a ti.

Vawiin programme-ah hian Pu Bhaskar Kakoty, Director, FINER chuan welcome speech sawiin, Conference huaihawt chhan leh FINER hmalakna hrang hrang te a tarlang  bawk. Pu Diwakar, MSME DI, Mizoram pawhin thu sawiin, Ministry of MSME in Mizoram state chhunga MSME te tana a hnatawh leh hmalawk tawhna hrang hrang te a tarlang bawk a ni.

Vawiin conference hi Session hnih: Inaugural leh technical session a then a ni a. Chawhma hi Inaugural session a tana hman a ni a, chawhnu hi technical session a tan hman a ni thung. Technical session-ah hian Power point presentation hmangin Pi Ru Yi Yong, Taiwan chuan “Bamboo Sector Opportunities’ tih thupuia hmangin zirtirna a nei a. Pu Jui Tai Hong, Taiwan in “Opportunities in MSME Sectors” tih  leh Dr.Himayoti Dutta, Asst. Professor, Department of Food Technology, Mizoram University in “Food processing in Mizoram through academia and research perspective” tih thupuia hmangin zirtirna a nei ve thung a ni.

Vawiin Conference-ah hian  Mizoram chhung leh pawn lama Entrepreneur te bakah, Entrepreneurship lama tui zirlai naupang  MZU leh College hrang hrang  5 atangin an tel a ni.