2836/2026-2027

Aizawl, 27th October, 2026: Vawiin khan RB Mc Cabe Hall, Aijal Club-ah Agriculture , Irrigation & Water Resources Department Minister Pu PC Vanlalruata chuan chhiatrupna thlen laia inbiakpawhna tangkai em em tur, 'Public Safety and Disaster Response Communication System (PSDRC)' a tlangzarh.

Khuallian, Minister Pu PC Vanlalruata chuan hetiang project lian, tangkai leh ro tling hawng theia a awm chu lawmawm a tih thu a sawi a. PSDRC chu Project lian leh sum pawh hautak tak a ni a ti a . Amaherawhchu Mizoram chu kan hriat theuh anga chhiatrupna thlen theihna sang tak (highly vulnerable) ah awm kan nih avangin he project hi kan tangkaipui hle dawn a ni, a ti. Mizoramin tlawmngai pawl tha tak tak kan nei chu lawmawm a tih thu sawiin, chhiatna lian tham tawhin sorkar mai ni lo, tlawmngai pawlte nen tha an thawhho thin chu hmuh a nuamin a ropui takzet a ni, a ti.

Chhiatrupna laka inven leh inpuahchahna (training) pawh neih thin a nih thu leh, hei aia ngawrh zawka neih a pawimawh thu a sawi bawk. Hetiang thil ro tling kan nei thei chu Chief Minister chungah pawh lawmthu sawiin, tha taka enkawl zui a nih theih nan tan la sauh sauh turin mawhphurhtute a chah a ni.

He hunah hian Pu Sushil Singh, IAS, DM&R Special Secretary chuan inlawmna thu sawiin, he khawl hi Mizoramin a mamawh takzet thu leh, harsatna kan tawh hunah a mamawhna leh a tangkaizia kan hrechhuak dawn a ni, a ti. India rama hetiang system an neih that ber berte nena intluktlâng a nih thu sawiin, hlawhtling taka hman a nih theih nan DC te leh DM&R Department te thawhhona tha tak neih a tul thu a sawi bawk.

Aizawl DC Er. Lalhriatpuia, IAS hnen atangin Technical Report ngaihthlak a ni a. Mizoram leilung dinhmun avangin chhiatrupna thlen thulhah communication tha kan mamawh hle tih sawiin, "He khawl hi antenna hmang a ni a, physical wire awm lovin signal dawn nan electromagnetic wave a hmang dawn a ni," a ti. Project chu eng ang pawhin tha mah se, a enkawlzui leh hman tangkai (Operation and Management) a that loh chuan a hlawhtling dawn lo a ni, tiin a sawi bawk.

He project khawih tu FC TecNergy company aiawh pawhin thu sawiin, anmahni chu alternate energy communication lama specialize an nih thu leh, India ram hmun hrang hranga an lo thawh tawh thin thu a sawi a. Mizoramah pawh kum tam tak an lo thawh tawh thu sawiin, tuna an khawl chuan chhiatrupna avanga current a awm loh hunah pawh darkar 100 tal chu inbiakpawhna a buai dawn loh thu a tarlang.

Public Safety & Disaster Relief Communication (PSDRC) System hi chhiatrupna thlen laia chhanhimtute (SDRF, Police, Fire Services) inbiakpawhna a chah (breakdown) loh nan a duan a ni. He system mechanism bulpui ber chu inbiakpawhna hmanrua tangkawp (overlapping communication) a ni a, a pui ber (primary) atan Aizawl khawpuiah DMR Tier-III Trunking network hman a ni a, Kolasib, Champhai leh Lunglei district-ah te DMR Tier-II Conventional network hman a ni thung. Hemi puitu (secondary) atan hian Mizoram pum huapa hman theih turin 4G/5G broadband kaltlangin Mission Critical Communication System (MCCS) a awm bawk.

Heng network pahnihte hi State Emergency Operation Center (SEOC), Aizawl-ah thlunzawm a ni a. Heta tang hian dispatcher-te chuan DMR leh MCCS hmangtute chu hmun khatah be pawhin thupuan (broadcast) an pe chhuak thei a ni. Call zawng zawng record thlap a nih bakah, GPS kaltlangin a hmangtute awmna hmun hriat theih a ni bawk. Harsatna thlen laia network leh hmanruate a thih mai loh nan Fuel-cell Hybrid Power leh solar hmangin darkar 100 chhung nung turin power backup dah a ni.

He tlangzarhna inkhawm hi Pu Zoramsiama Hmar, ADC Aizawl in lawmthu sawiin a khar a ni.