Vawiin khan Keifang Presbyterian English School chuan an school hall-ah HSLC pass tharte lawmpuina hun an hmang a. Minister of Power & Electricity, Art & Culture etc Pu R. Lalzirliana chu Khuallian niin a hmanpui a ni.

Khuallian chuan Keifang Presbyterian English School in hun lawmawm tak kan tawng leh ta a, hei hi zirtirtute thawhthat vang a ni, a ti a. Principal leh zirtirtute chu fakin zirlaite ang khat veka entu leh thliar hrang ngai lo, tumah hnar duh lo an nihna hi a chhuanawm hle a ni, a ti a. School leh a chhehvel fai taka vawn a ni chu lawmawm a tih thu a sawi a. Mi thahnemngaite inpekna avangin school pawh tha taka kalpui a ni ta zel a ni, a ti a. Thiamna kan neihte hmang tangkaiin kan chhungkua, khawtlang, ram leh hnam tana thawhchhuah hi kan tihtur pawimawh tak a ni tiin zirlaite a fuih a. Kan ram hmasawnna atan kan thiamnate tihpun kan tum tur a ni, a ti a. Hmanlai atanga kan pi leh pute ngaihsan leh ngaihhlut em em tlawmngaihna, huaisenna, mi hnuaihnung zawk chawikan tumna,mi rethei zawk tanpui duhna te hi thalaiten vawng nung reng ang u tiin kalkhawmte a chah a. Kan tawngkam chhuak leh kan nundan hi a thuangin a kal tur a ni, a ti a. Mizoram hi khawchhak lam kawtchhuah lian tak kan ni chho dawn a, heng hunah hian hmasawnna thleng tur chuan thiamna tak tak kan neih a ngai a ni, a ti a. Tunlai thalaite zingah hnathawh tum lo leh peih lo, nu leh pate hlawh ringawt ring an tam telh telh a, kan thatchhiatna hian min chimral a hlauhawm a ni tiin taihmak kan zir thar leh a ngai hle a ni, a ti a. Nun uluk turin zirlaite chahin an kal zelna turah duhsakna a hlan nghal a ni.

Presbyterian English School, Keifang hi kum 1997 khan din niin teaching staff 27 leh non-teaching staff 2 an awm mek a. HSLC distinctiona-a pass 5 an zirlaite zingah neiin 1st Division-a pass 18 an awm a ni. Pass percentage hi 90.70% a ni a. Zirlai 633 an awm mek a ni.

Principal Pu Zionthanga chuan kalkhawmte lawmna thu a sawi a. Khuallian, SDO (C) Pu R. Vanlalsawma leh Saitual Town Officers Club ten zirlai pass thar leh subject hrang hranga tithate hnenah citation an hlan a. Zirlai titha ber C. Lalduhsaka hnenah ‘C. Lalrosanga Award for PESKF HSLC Topper’ hlanna neih a ni a. Senior Teacher Pu Zoliana Pachuau chuan lawmthu sawina in hun a khar a ni.

Hemi zawh hian MSU buatsaihin Saitual khaw chhunga school 12 atanga HSLC leh HSSLC pass tharte lawmpuina hun hman a ni a. Minister of Power & Electricity, Art & Culture etc Pu R. Lalzirliana chu Khuallian a ni a. HSLC pass zawng zawng hi mi 158 niin HSSLC pass hi mi 79 an ni.