No.7417/2020-2021

Vawiin khan Power & Electricity changtu Minister Pu R. Lalzirliana, Tawi Assembly bialtu ni bawk chuan Saitual District tana pisa thar District Agriculture Office leh District Management Unit, FOCUS Office te chu a hawng a. Heng office hawnna leh Saitual District a FOCUS bul tanna tur hawnna program chu Keifang Venghlun Branch YMA Zawlbuk a neih chu a hmanpui nghal a ni.

Pu R. Lalzirliana chuan District thar thuam leh chei chu vawileh khata tih theih loh a ni chungin hripui leng karah pawh a theih ang angin Sawrkarin a tuam hlawm a, hengah te hian mipuiin lawm nachang kan hriat a pawimawh a hle, a ti a. Kum khat awrh chhungin District DUDO Office te, DEO leh Samagra Office te, DHO Office te hawn a ni ta te, DC Complex sakna tur sum te chu dahin a lung pawh phum a ni te hi lawmawm tiin midangte awt mai lovin lungrual takin hma lam panin hna thawk zel ang u tiin mipuite a chah a ni.

Minister chuan FOCUS project Saitual District-ah kalpui tan a ni ta chu lawmawm tiin District mipuite chu Mizoramah he project tihlawhtlingtu ni ngei turin tan la turin a fuih a. Saitual District-ah sial vulh lamah hma lak nise tiin a duh thu a sawi lang a. Thing leh mau chereu a vei thu sawiin FOCUS in sik leh sa inthlak danglam karah loneih chu a thupui pakhat anih angin ram ngaw neihsa tichhe lo zawnga lo neih leh hmalak mipuite an zirtir ngei a beisei thu a sawi.

He hun hmanpuitu dang Pu L. Thangmawia, MLA leh Vice Chairman, Human Resources Development Board chuan FOCUS hmalakna chuan intodelh lam a hawi thu sawiin heng hmalaknaah hian Mizoram economy a chawikang thei a ni, a ti.

Program kaihruaitu Pu Lalhmingthanga, Co-Chairman leh Commissioner & Secretary, Agriculture chuan Mizorama FOCUS bul tanna te, a tum te leh a huam chin te sawiin kum 6 chhunga kalpui tur anih thu leh a hlawhtlin chuan District dangaH pawh kalpui anih tur thu te a tarlang a ni.

Pu VL Hruaizela Khiangte, DC Saitual chuan kum khat chhungin District thar in rahbi thar kaina engemaw zat a neih thu a sawi lang a. Pu R.K. Nithanga, CEO leh State Project Director, FOCUS in Project chungchang sawizuana hun a hmang bawk a ni.

Chawhnu lamah FOCUS chungchanga inhrilhhriatna sensitization program hman zui nghal a ni a, FOCUS a thawk mithiam ten training an pe bawk an ni.

DAO, Saitual District leh FOCUS Saitual a DMU hotu atan Pu B. Lalhmuchhuaka, MAS dah a ni a, amah bakah FOCUS staff Champhai atanga siksawi leh a thar, an vaiin mi 18 te hi FOCUS office tharah dah an ni a. Office pahnih te hi Keifang Tribal Girls Hostel building-ah dah lailawk a ni.

Fostering Climate Resilient Upland Farming Systems in the North East (FOCUS) hi United Nations peng pakhat International Fund for Agriculture Development sum atanga project ruahman niin Mizoram leh Nagaland-ah kalpui mek a ni a. Mizoram ah chuan March 2019 atanga bul tan niin District 4 - Champhai, Kolasib, Serchhip leh Mamit chhunga khaw 272-ah hma lak mek a ni a. District thar 3 a khaw thenkhat te siksawi a nih tak avangin District dang 2 Saitual leh Khawzawlah te FOCUS hi huam tel tura hmalakna kal zelah vawiin khan Saitual District-ah FOCUS bultanna tur chu hawn a lo ni ta a ni.

FOCUS in a tum bulpui ber chu zokhaw lama lo nei a eizawng chhungkua 64,500 ten thlai an thar tam zawk theih nana tih hmasawn leh kumtin lo hal avanga sik leh sa inthlak danglam nasa lutuk tih ziaawm a ni.

Champhai District atanga Saitual District a peng khaw 13 ah te chuan he project hi kalpui a lo ni tawh a. Saituala FOCUS bul tanna neih takah chuan Aizawl District atanga Saitual District a peng khaw 27-ah te he project hi kalpui leh a ni dawn a. Heti hian FOCUS in Mizorama khaw 301 a huam ta a ni. Heng atan Farmer Interest Group 2766 din a ni tawh bawk a ni.

FOCUS ah Department pali - Agriculture, Horticulture, Animal Husbandry & Veterinary leh Soil & Water Conservation te an tel a ni.

Minister hi Agriculture Department Director Dr. Saithantluanga leh a thawhpui dangte leh FOCUS mithiam ten an tawiawm a ni.