No.7418/2020-2021

Pu Lalchhandama Ralte School Education Minister chuan a bial Tuivawl bial chhung khaw hrang hrang a fang mek a. Nimin khan Sunhluchhip, Chhanchhuahna khawpui, N.Serzawl leh Sailutar khuate a tlawh a. Heng khaw hrang hrangah hian sikul leh sorkar hmun hma dangte a tlawh kual a. Vawiinah Darlawn khaw chhunga sorkar office, police station, damdawiin leh school te a tlawh kual bawk a, an mamawh leh harsatna an neih te a en nghal.

Khaw hrang hrang a tlawhnaah te hian amah lo dawngsawngtu khawtlang hruaitute hnenah thu sawiin Minister chuan Sinlung Hills District Area chhunga hmasawnna tur sorkarin a thawk mek a ni a ti a. Helai hmun tihhmasawnna atan hian zirna lamah zirtirtu thahnem tak dah belh anih thu te, Higher Secondary School Science leh Arts zirna hawn thar anih thu te, Manipur nena inkal pawhna kawngpui cheng nuai sang tel man  thawh mek anih thu te bakah Baga nena  inkal pawhna tur survey neih mek a nih thu te a sawi bawk a ni.

Minister chuan tun sorkar term kal laiah Covid-19 leh inthlan kaihhnawih avangin hnathawh theihna hun a tlem a, chuti chungin sawrkarin hmachhawp a lo neih lawk  te chu  thawh chhoh  zel a ni a ti. Covid-19 avangin India ram pumin sum leh paiah harsatna a tawk a. Tunah chuan zawi zawiin hrilengin  ziaawm lam a pan a, hmasawnna hnathawh pawh a pangngaia a kal theih thuai beisei a ni a ti. Ramin harsatna a tawh lai hian sorkarin mipui mamawh zualpui bik te chu ngaih pawimawhah a nei rih a ni a ti a. Khaw thenkhatin thal laia tui lama harsatna an neih chu sutkian dan kawng zawn anih thu a sawi bawk a ni.

School Education Minister Pu Lalchhandama Ralte chuan khawtlang hmasawnna atan zirna a pawimawh ber a ti a. Khawvel hmasawnna hmu phak turin nula tlangval chher hriama, zirna ngai pawimawh turte, zirna tibahlah thei thil do turin tein a chah a ni. Vawiina Darlawn khaw chhunga sorkar hmunhma a tlawh kualnaah hian kumin academic session-ah school hawn theih loh chhung a rei avangin naupangte pawl sawn nan Bridge course buatsaih a ni dawn a. Tunah hian Printing press-ah chhut mek a ni a ti bawk a ni.

School Education Minister-in a bial a tlawhnaah hian Darlawn Sub Division Official te, School Education Department Official te leh Khawtlang hruaitu ten an tawiawm a ni.