No.46/2021-2022
Aizawl, 7th April, 2021: Vawiin chawhnu khan SEDP hnuaia Arecanut (Kuhva) Plantation Pilot Project hawnna Land Resources, Soil & Water Conservation Department Conference Hall-ah neih a ni a, LR,S&WC Minister Pu R.Lalzirliana chu Khuallian a ni a, Pu Lalrinsanga Ralte, MLA, Vice Chairman, Rubber & Allied Crops Development Board chu Khualzahawm a ni.

Khuallian leh Khualzahawm te hian Kelsih leh Darlawng khuaa mi sawmhnih ve ve hnenah kuhva chin bultan nan a tanpuina Rs 25,000/- theuh an hlan a ni.

Khuallian Pu R.Lalzirliana chuan ropui leh nasa zawka hun hmante a chakawm viau laiin COVID-19 hripui avangin ramchhungah harsatna hrang hrang a awm mek a ni tih sawiin kalkhawmte hnenah an hriatthiamna a ngen a. Minister chuan taima tak leh rinawm taka thawk te hi mi hlawhtling an ni a, vawiina kuhva chinna atana sawrkarin bultanna a pek te hi sawrkar chawimawi lettu ni turin leh midangte chawkphurtu ni turin a chah a. Kuhva hi a market lamah chuan huphurhawm a ni lo a, market hresain plantation hi kalpui a ni, a ti a. Amaherawhchu vanduaithlak leh beisei loh takin tun hnaiah hmun thenkhatah kuhva a tam tih report a awm a, a tam hriin a man te anih tawp loh chuan a reh lo tluk a ni a, chuvangin a tam atanga fihlim tur hian a bultan atanga fimkhur turin a chah a. Kuhva chi tha (quality seeds) ngaih pawimawh a nih tur thu leh awlsam zawnga hlo tur kah ringawt te hi kuhva kungin a tuar tih hriain, kum 3 chhung kuhva hmunhma thlawhfaiin a hri laka an himna a thlen niin a lang tih rilruah hre reng turin a chah bawk a ni. A ching tawh ten an sawidan chuan a kung hi kum 20 tal ni se, a tam mawh deuh e an ti tih sawiin, hmathlir thui tak nei chunga kuhva te ching turin a chah bawk a ni. Minister chuan Zoram hi keini lo chuan an siam dawnlo a, a ram neitu kan rinawma kan taimaka theihtawp kan chhuah chuan kan intodelh ang, tiin a sawi.

Khualzahawm Pu R.Lalrinsanga chuan a bultan lai hi a hautak lai a ni tih hria a, tumruhna, impumpekna, mahni inthunun theihna nena hna thawk turin kalkhawmte a chah a, kuhva a bultanna hian Mizoram economy a chawi kang thei a ni tih ring tlat a, a hmasa mi sawmli ten bul an tan that chuan midang te tan pawh kawng an sah hawn sak thei a ni tih hria a, thahnem ngai tak leh diktaka bul tan turin a sawm a ni.

He hun hi Pi K.Lalrinzuali, Secretary, LR,S&WC Department chuan a kaihruai a, Pi C.Lalmalsawmi FAO chuan hunserh a hmang a, Pu Hualthanga Chhakchhuak, Director chuan lawmthu sawiin he hun hi a khar a ni.

Rubber & Allied Crops Development Board hian Rubber, Kuhva, Coffee, Hmunphiah, etc. a hmalak dan tur a ngaihtuah a. Heng thlai chinna atan hian funding awm thei ang angte ngaihtuah niin project te siam a ni a. Rubber project atan hian Rs 1644.12 crore siam niin Rubber Board ah thehluh a ni a. Rubber Board pawhin mi an phurpui viau a, NABARD atanga loan la ve leh chhawngin buaipui mek a ni. Coffee pawh hi Board afanga fanpuina beisei a ni bawk. Chutih mek laiin kuhva leh hmunphiah ah erawh chuan Central atanga fund hmuh theih a ni dawn lova, SEDP atang chauh a tih theih a ni dawn a, chumi atan chuan Pilot project angin chhungkaw 300 tan Rs 75.00 lakh ruahman a ni a. Chhungkaw pakhat tan Rs 25000/- ruahman a ni a, he sum hi a vahna, mangkhawhna leh hmunhma buatsaihna tur atan a ni. Kumin a SEDP hnuaia Kuhva chingtu turte chu Kolasib District atangin chhungkua 160, Mamit District atangin chhungkua 62 leh Aizawl District afangin chhungkua 78 te an ni.